यदि जनविद्रोह जुल धाःसा ताःलाइ ला?

एनेकपा (माओवादी) या असन्तुष्ट नेता मोहन वैद्य (किरण) पक्षं पार्टी अध्यक्ष प्रचण्डया बिचाः विरुद्ध कडा रुपं थःपिनि बिचाः तयेगु झ्वलय् देशय् हानं जनविद्रोह यायेगु नीति न्ह्यःने तयादीगु दु। पार्टीइ थज्याःगु प्रस्ताव वःगुलिं शान्ति प्रक्रियाय् वयेधुंकूगु माओवादी दुने तःधंगु भुखाय् ब्वयेका बिउगु दु गुकिया कम्पन माओवादीं पिनेया राजनीतिक दलय् तकं थ्यं वंगु दु। सखे थुकी विदेशी शक्तितय्सं नं रुची तयाहःगु दयेफु ।

निदँ ति न्ह्यः नं जनविद्रोह यायेगु धकाः माओवादीं राजधानीइ द्वलंद्वः मनू क्वकयाः छवाः तक पूरा देय् ठप्प याःगु खः। व नं छगू जनविद्रोहया हे अभ्यास खः। तर स्थिति अःखः जुयाः माओवादी विरुद्ध हे मनूत सतकय् कुहां वयाः 'विद्रोह' लित कायेमाःगु अवस्था जुल। यदि आः नं अज्याःगु छुं पलाः ल्ह्वन धाःसा उकिं बांलाःगु लिच्वः पिहां वइ धकाः आशा यायेगु थाय् मदु। छुं जुयाः माओवादीं याइगु विद्रोह सफल हे जुयाः सत्ता कब्जा यात धाःसां थौंया विश्व परिस्थितिइ अज्याःगु सत्ता ग्वःन्हु टिके जुइ?

चुनाव त्याका वःपिं वामपन्थीतय्त ला टिके याके मबियाच्वंगु थ्व इलय् विद्रोह यानाः वःपिंत विश्वया गुगु शक्तिं समर्थन याइ? बरु अःखः अज्याःगु विद्रोह पूरा माओवादीयात हे ध्वस्त याकेगु लागिं विदेशी शक्तियात आमन्त्रण याये थें जू वनेफु। छुं जुयाः कन्हय् अज्याःगु अवस्था पिहां वल धाःसा झिदँ ताःहाकःगु जनयुद्ध यानाः माओवादीं गुगु उपलब्धी चूलाकूगु खः व नं त्वःफिके मालीगु अवस्था वयेफु। उकिं आःया इलय् माओवादीया भूमिका ल्हातय् दुगु उपलब्धीयात गय् यानाः जिउ सुरक्षित यानाः अग्रगामी पलाः छिना वनेगु हे जुइमाः ।

More Stories Like this