ईलोहंया चिबाखं गोष्ठी

'अंग्रेजीं 'शर्ट मोडर्न स्टोरी' धाःसां नं झीगु निंतिं चिबाखं आधुनिक बाखं हे खः। चिबाखं चीहाकः जुइमाःगु ला ख हे खत, लिसेलिसें विषयवस्तु, अनुभूति व परिपक्वता नापं भावनात्मक प्रस्तुती नं दयेमाः।' चिबाखंयात कयाः बाखंच्वमि भूषणप्रसाद श्रेष्ठया धापू खः थ्व। ईलोहं प्रकाशनया ग्वसालय् नकतिनि जूगु चिबाखं गोष्ठीइ समीक्षक कथं न्ववासें वय्कलं थ्व खँ धयादीगु खः ।

नेपालभाषा साहित्यय् चिबाखंया विकास व विस्तार जुया च्वंगु दःसां नं थुकिं ब्यापकता धाःसा काःगु खने मदु। उकिसनं मथूपिं हे अप्वः मनूत झीथाय् दु। थ्व हे खँयात वाःचायेकाः चिबाखंया विकास व विस्तार यायेगु तातुनाः ईलोहं प्रकाशनं इलय् ब्यलय् चिबाखं गोष्ठी याना वयाच्वंगु दु। वंगु शुक्रवार सातोआकी भवनय् ईलोहंया निक्वःगु चिबाखं मुँज्या जुल। थुगु ज्याझ्वः ईलोहं प्रकाशन, प्रतिभा समाज व नवज्योती एफ.एम.या न्हूजः ज्याझ्वःया मंकाः ग्वसालय् जूगु खः ।

चिबाखं च्वयेत गुलिसिनं न्यागू तत्व माः वा च्यागू तत्व माः धाःसां नं बाखं च्वमि रमेशकाजी स्थापितया धापू कथं ब्वँमि वा न्यँमिया नुगलय् थीक च्वयेगु शैलि गज्याःगु खः धकाः चिन्तन यानाः प्रभावकारी भाषा व शैलिं च्वयाः सिर्जना जूगु चिबाखं हे बांलाःगु चिबाखं जुइ ।

झीगु समाजय् परम्परांनिसें बाखं कनेगु व न्यनेगु चलन न्ह्याना वयाच्वंगु दु। ऐतिशासिक तथ्य कथं ने.सं. ६२५ निसें धार्मिक ग्रन्थपाखें नेपालभाषाय् बाखं विधाया सुरुवात जूगु खनेदु। ने.सं. ६३८ निसें उपदेश कथं पञ्चतन्त्र थेंज्याःगु लौकिक बाखंत पिलू वल। ने.सं. १०३१ सं. पं. निष्ठानन्द बज्राचार्यं धार्मिक बाखंयात लौकिक बाखनय् हिलायंकुसेंलि आधुनिक बाखंया विकास जुयावंगु खः। लिपा शिव विलासं लौकिक बाखंयात आधुनिक बाखनय् दुथ्याकाः चिबाखंया रुप बियादीगु खनेदु। चिबाखनय् म्होचा खँग्वलं यक्व खँ कःघायेमाःगु जुयाः थ्व च्वयेत च्वमिपिंसं यक्व मेहनत यायेमाः ।

गोष्ठीइ ब्वंगु बाखंत मध्ये शरद कसाःया बाखं राजनीतिक व्यंग्य खःसा विजयरत्न असंबरेया बाखनय् सत्ताय् च्वनाः थःगु जक स्वार्थ स्वइम्ह नेताया चरित्र क्यनातःगु दु। दिब्या ताम्राकारया बाखनय् छम्ह मालिकं जीवनभर थःगु सेवा यानाच्वंम्ह खिचायात विस्वासघात याःगु चित्रण दुसा पुष्परत्न ताम्राकार 'स्वीटहर्ट'या बाखनय् काय हे बुइकेमाः धकाः न्याम्ह म्ह्याय् बुइकूपिं मांबौयात याकः कायं म्वाय् चुइकूगु घटना दुथ्याः ।

समग्ररुपं अन ब्वंगु बाखनय् आपालं विविधता दुगु खँ समिक्षक श्रेष्ठं कनादी। अप्वः काव्यात्मक व व्यंग्यात्मक बाखं वःगु वय्कःया बिचाः दु। गाःमगाः चाःमचाः दःसां नं बाखंया स्तर धाःसा न्हापा स्वयां यक्व हे थहां वंगु अनुभव वय्कलं कनादिल। थुकथं हे बाखंया मुँज्यात जुयावन धाःसा चिबाखंया विकासय् तिबः जुइगु वय्कःया बिचाः दु। सभानायः लिसें ईलोहं प्रकाशनया निर्देशक नरेशवीर शाक्यं न्हापां जूगु मुँज्या स्वयां थुगु मुँज्याय् यक्व प्रगति जूगु खँ कँसें लिपाया मुँज्या अझ बांलाइगु विश्वास बियादिल ।

गोष्ठीइ ब्वंगु बाखं धलः बाखं - च्वमि
१) व मनू - सुनिता जुनु
२) मतिनाया मू - सुरजवीर बज्राचार्य
३) जय प्रलय - बद्री बेदना
४) ह्वाउँ ह्वाउँ सम्मलन - कृष्णभक्त बोडे
६) थःत म्हमस्यूम्ह जि - बुद्ध नेवाः
७) म्हमस्यूम्ह मिसा - दया खड्गी
८) स्वार्थी - रमि बज्राचार्य
९) व - सुनिल बज्राचार्य
१०) कलम - तुयु पुं
११) मुक्तक बाखं - केदार सितु
१२) जिमिगु नं पाः वइ - राजा शाक्य
१३) विज्ञापन - इश्वरीमैँया श्रेष्ठ
१४) आचकलि - सौरभ शाक्य
१५) गुणया पलेसा - दिब्या ताम्राकार
१६) लिच्वः - पुष्परत्न ताम्राकार
१७) सत्ताया सवाः - विजयरत्न असंबरे
१८) हस साहेब - श्याम आसा
१९) लना - शरद कसा
२०) जात्रा - राजेन्द्र मानन्धर
२१) बाखं - नारद बज्राचार्य
२२) भिंद्यः - नरेशवीर शाक्य

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया