क्रेडिट कार्डपाखें न्यागू करोड कयाः दान

न्यूयोर्क/साइबर आक्रमणकारीतय्सं अमेरिकी सुरक्षा कम्पनीइ इन्टरनेट ह्याकिङ याःगु दु। 'अनोनिमस' नांया इन्टरनेट ह्याकरतय् पुचलं छगू अमेरिकी सुरक्षा कम्पनीया डाटा लिसें द्वलंद्वः ईमेल थाय्बाय्, पासवर्ड व क्रेडिट कार्डनाप स्वापू दुगु जानकारी हासिल यानागु दावी याःगु खः।
ह्याकरतय् पुचलं अमेरिकी सुरक्षा कम्पनी 'स्ट्रैट-फोर'या गाहाकितय धलखय् अमेरिकी रक्षा मन्त्रालय, संचार समुह कानुन-व्यवस्था लागु याइगु संस्थात दुथ्यानाच्वंगु दु। कम्पनीया डाटा लिसें आपालं जानकारी कायेत थःपिं सफल जूगुया लिउने 'स्ट्रैट-फोरं' जानकारीयात 'एनक्रिप्ट' अर्थात पूवंक सुरक्षित ढंगं तयामतःगु दावी ह्याकरतय् पुचलं याःगु दु। ह्याकरतय् पुचलं अनलाइन छगू सन्देश जारी यासें क्रेडिट कार्डया जानकारीपाखें थःपिंसं न्यागू करोड तका कयागु व उकियात थीथी सामाजिक व स्वयंसेवी संस्थायात दानय् बियागु नं धयातःगु दु।
थुगु घटना लिपा 'स्ट्रैट-फोरं' थःपिनिगु 'सर्भर'या लिसें ई-मेल सेवा दक्वं स्थगित याये धुंगु खँ धाःगु दु। थ्व स्वयां न्ह्यव 'अनोनिमसं' वित्तिय संस्थाय् नं साइबर आक्रमण याये धुंगु दावी याःगु दु।