पुस १८ या प्रचार फेसबुकपाखें

येँ(सन्ध्या टाइम्स)/थ्व हे वइगु पुस १८ गते तःजिक न्यायेकीगु एकता दिवस ताःलाकेत नेपालभाषा स्यनेकने पुचःया ग्वसालय् सहलह मुँज्या नापं तुच्चा ज्याझ्वः जुल।
आइतवाः नेपाल आदर्श माविइ पुचःया सल्लाहकार कृष्णभक्त मानन्धरया प्रमुख आतिथ्यताय् जूगु उगु ज्याझ्वलय् मू कथं प्रचार प्रसारया विषयय् सहलह जूगु खःसा थुकिया निंतिं पर्चा पोष्टर स्वयां नं ईमेल, इन्टरनेट व फेसबुक प्रभावकारी जुइगु बिचाः वःगु खः। अथे हे छेँखापतिकं मिसातय्सं थःपिं सहभागी जुइगु नापं थः मिजंतय्त नं ग्वाकेमाःगु व थः लिचिलाः मेपिंत जक ज्याझ्वलय् ब्वति कायेके छ्वया हयेगु मयासे थः हे न्ह्यचिलाः जःलाखःला नापं थःथितिपिंत नं ब्वना हयेगु प्रबृत्ति विकास यायेमाःगु खँ नं पिहांवःगु खः। नेवाः न्ह्यलुवा राजेन्द्र श्रेष्ठ, मोडर्न नेवाः स्कूलया प्रिन्सिपल दिपक तुलाधर व बाजं गुरु शेषनारायण महर्जनपिंसं नं ज्याझ्वलय् बिचाः प्वंकादीगु खः।
ग्वसाः खःलया नायः रमिता शाक्यया सभापतित्वय् न्ह्याःगु उगु ज्याझ्लय् ग्वसाः खलःया सकलें दुजःपिं उपस्थित जुयादीगु खः।