राजनैतिक अराजनैतिक झ् छु खः?

नर्मदेश्वर प्रधान
अखबारय् खनागु घय्पुनाच्वंगु किपातय् च्वंपिं नेतात कमरेड झलनाथ खनाल व कमरेड के.पी. ओलीपिं खः। अंकमाल जरुर नं भिंतुना व सौहार्दताया प्रतीक खः। सहिष्णुता, सद्भावना प्रकट याये मालकि अंकमाल प्रभावकारी जुइ। थ्वं ज्या बी।

खँयाखँय्
अखबारय् आकाझाकां किपा खनी। निम्ह नेतात आलिंगन मुद्रा। मानौ म्ह छगू ख्वाः जक निपाः थें। आलिंगन ह्वालु खने मदु। कस्से जू। निम्हेसिया ख्वालय् मुक्त मुस्कान। किपाया सन्दर्भ जुयाच्वन। निम्ह नेतातय् दथुइ एकताया खँ। खिचा ल्वाः थें ल्वाल्वां हे फुर्सद मदुपिं नेतात। इमि दथुइ एकताया बुखँ न्यने दइ। जनतायात लय्ताःया खँ जुइ। निम्हं महत्वपूर्ण नेतात। घय्पुनाच्वंगु किपा खनी। गुलिखे मनूत लय्ताइ। थथे हे नेतातय् दथुइ मेलमिलाप दइ। देश भिनी। सुथां लाइ। गुलिस्यां आशा याइ। छगू दल व मेगु दल दथुइ जक मखु स्वयं छगू दल दुने नं अनेक पक्ष विपक्षी धारत खने दइ। पिनें पार्टी छगू जुइ। दुनें थीथी गुट काटामार जुयाच्वनी। पिनें धयाच्वनी। प्रजातन्त्रात्मक पार्टीं वैचारिक विविधता, स्वतन्त्रता, स्वाभाविक जुइ। मानौं ल्वापु यायेगु प्रजातान्त्रिक अभ्यास खः। मानौं वैचारिक शुद्धीकरणया निंतिं खिचा थें ल्वायेगु अनिवार्य जुइ।
गबलें नेतातय्सं न्ह्यःसू चाःपिंसं थें धया हइ। झीगु पार्टी ल्वाकाच्वंपिं बाह्य तत्व खः। साम्राज्यवादी, विस्तारवादी शक्तित खः। ल्वाकीपिं पिनेया जुइफु तर विद्वान त्रिनेत्री, ध्यानी, ब्रम्हज्ञानी नेतात मूर्ख मस्त मखुकर्पिंसं ल्वाकेवं ल्वायेत। धाइ, विश्वया गुगुं शक्तिया न्ह्यःने आत्मसमर्पण याये मखु। थुज्वःपिं नेतात विदेशीतय्गु इशाराय् छाय् ल्वायेत तयार जुइ? ल्वाकाच्वन धकाः सिउपिंसं छाय् ल्वाकीपिनि दलाली यानाः थःथःगु स्वार्थय् ल्वायेगु? मेपिंसं ल्वाकल धकाः जनतायात गुमराह यायेगु? दलतय्सं थौं जनतायात भ्रमय् लाकेत स्वइ। माओवादी पार्टीइ अन्तर्संघर्ष तीव्र खनेदइ। छगू खेमां धाइ "थ्व ल्वापु अन्तर्संघर्षया जक मखु। वर्ग संघर्षया खः।" ल्वापुं मेगु हे मोड कया हइ। यर्थाथ छु, गथे थुइकेगु? सामान्य मनू। लाल कायेमसःपिं। अनिश्चित राजनीतिक समुद्रय् थुमित नेतातय्सं वांछ्वया बी। अनिश्चित समुद्रया लः घुतुघुतु त्वनी। विवश।
अखबारय् खनागु घय्पुनाच्वंगु किपातय् च्वंपिं नेतात कमरेड झलनाथ खनाल व कमरेड के.पी. ओलीपिं खः। अंकमाल जरुर नं भिंतुना व सौहार्दताया प्रतीक खः। सहिष्णुता, सद्भावना प्रकट याये मालकि अंकमाल प्रभावकारी जुइ। थ्वं ज्या बी। अंकमालया सांस्कृतिक, कुटनीतिक महत्व मदुगु मखु। कमरेड झलनाथ खनाल व के.पी. ओलीजुया अंकमालया किपातं नं एमाले पार्टी एकताया तरंग थनेत स्वइ। पार्टीत आन्तरिक रुपं खण्डित जुइ। पार्टीया विकासया निंतिं व घातक जुइ। ततःधंगु पार्टीइ जुइगु आन्तरिक विखण्डनं देशयात हे बांमलाःगु प्रभाव लाकी। झलनाथ व के.पी. ओली। एमालेया वरिष्ठ नेतात। निगू दिशा नालाच्वंपिं। इमि दथुइ सहमति, सहकार्य जुइन। आलिंगन पोजया इमिगु किपातं सन्देश बी। आशा ब्वलनी।
तर मेम्ह नेताया प्रतिक्रिया वइ। आलिंगनं जक एकता वइ मखु। एकता भावनाया खँ खः। झसंग वनी। खनी। म्हम्ह ल्वाकां, शरीर प्यपुंकाः घय्पुनाः जक मन मिले जुइ। एकता जुइ। धाये फइ मखु। गुलिस्यां नगरवधुलिसे आलिंगन याइ। छग्वारा चिनी। इमि मुद्रायात एकताया प्रतीक धाये फइला? जी ला? थ्व निगू आलिंगनं प्वाथय् दया बिउसां व मचायात समाजं अवैध खंकी। नगरवधुलिसेया आलिंगनं परिवार निर्माण जुइ बी मखु। देशय् थौं नेतातय् चरित्र नगरपुत्र, नगरबधुतय् थें जुयाबी। देशय् राजनीतियात वेश्यालयकथं ब्वलंकेगु अभ्यास जुयाच्वनी। घय्पुनाच्वंगु किपा प्रसारय् हःगु निन्हु मदुबलय् कमरेड के.पी. ओलीं घोषणा याइ "जि प्रधानमन्त्री जूसा देशया फुक्क समस्या चट् याना बी।" आलिंगनया उद्देश्य भावनात्मक वा रणनैतिक छु खः मनूत अलमले जुइ। "भिक्षु, साधु, सन्त जुइत सुं
राजनीतिइ सनी मखु।'' के.पी. ओलीं मनूतय् अलमलयात चीका बी। आलिंगनया किपाया सही रहस्य उला बी।
मचाबलय्। आकाशय् ब्वयाच्वंगु भुतुमाली स्वये। चानाः वइ। काये। लाये। आशा याये। चाना वइ। चानावःगु भुतुमालि जिगु अधिकारया जुइ। सुनां नं काये दइ मखु। काःसा वलिसे ल्वाये। थौंकन्हय् कांग्रेसया नेताद्वय रामचन्द व देउवाया खँ न्यने। जिगु मचाबलय्या मनस्थिति लुमनी। "चाना वइगु प्रधानमन्त्री पद जिगु।"
रामचन्द्र हाली। "जिं लाये दयेमाः।" देउवां भट्भटे याइ। आकाशय् ब्वयाच्वंगु प्रधानमन्त्री पदया भुतुमालि स्वस्वं इपिं ल्वानाच्वनी। कांग्रेस छकू। छकू कांग्रेस धाइ। थ्वया नायःया ख्वाःपाः धाःसा सदां बापाः चर्के जूगु जक खने दइ।
भाजु झलनाथ व केपी ओलीया घय्पुनाच्वंगु तस्विर स्वये। राजनीतिक अर्थ काये। मती वइ। जिगु सोच अति राजनैतिक जुल। तस्विरय् अराजनैतिक अर्थ नं दयेफु। जि घुरे जुइ। थौं समलिङ्गीतय्सं थःगु अस्मिता, अधिकार, सौन्दर्यशास्त्रया निंतिं संघर्ष याइ। इमि नं सामाजिक मर्यादा दयेमाः। इमिसं सः थ्वयेकी। मिजं समलिङ्गीतय् नं यौनिकता दइ। इमिसं ख्यें थ्वइ मखु। इमि रतिरागात्मक तृप्तिया विधि थःगु हे दइ। भाजु झलनाथ व के.पी. ओलीया आलिंगनवद्ध तस्विर लुमनी। विश्वास जुइ। वय्कःपिनि किपातं वय्कःपिं मिजं समलिङ्गी। रतिरागात्मक क्रियाय् समर्पित जकं मखुला?

More Stories Like this