सर्वोच्च अदालत व संसदया तनाव

संविधानसभाया म्याद हानं थपे याये दइ लाकि धकाः मदइ धइगु खँयात कयाः न्यायपालिका व व्यवस्थापिका दथुया विवाद थ्व इलय् छगू न्हूगु विषय जुयाः पिलू वःगु दु। सर्वोच्च अदालतपाखें आः संविधानसभाया म्याद हानं थपे याये दइ मखुत धकाः याःगु फैसला व उगु फैसलाया बचाउया लागिं स्वय्म सर्वोच्च अदालतया प्रधानन्यायाधीश हे लगे जुयाच्वंगु कारणं थ्व विवाद तःधना वंगु खनेदु। सर्वोच्चया उगु फैसलाया पुनरावलोकन यायेगु लागिं सरकार व संसदं निवेदन बीगु तयारी यानाच्वंगु इलय् लाक्क प्रधानन्यायाधीश खिलराज रेग्मीं फैसलाया पुनरावलोकन याये फइ मखु धकाः न्ववाना बीवं छ्वः मिइ घ्यः लुइ थें जुया बिउगु दु। वय्कःया उगु धापूयात कयाः नेतातय्सं आलोचना समेत सुरु याना हयेधुंकूगु दु।
खतुं सर्वोच्चं याःगु छुं नं फैसलायात कयाः पुनरावलोकन यायेगु सकसिकें अधिकार दु। संसद व सरकारयात नं उकिया लागिं निवेदन बीगु अधिकार दु। तर निवेदन वये न्ह्यः हे सर्वोच्चया प्रधानन्यायाधीशं उकिया 'सुनुवाई' जुइ मखु धाःगुलिं थज्याःगु धापू विवादय् लाइगु स्वाभाविक खः। तर वय्कःया थ्व धापूयात आलोचना यानाच्वंपिं नेतातय्गु नियत नं थुकिं यानाः बांलाः मजू धइगु स्पष्ट याना बिउगु दु। छाय्धाःसां नेतातय्सं छखे खुलाया दुने संविधान तयार यानां तुं त्वःते धकाः पिने धयाच्वंगु दु, मेखे वहे नेतातय्सं संविधानसभाया म्याद आः थपे याये दइ मखुत धकाः वयाच्वंगु धापूया प्रतिवाद नं यानाच्वंगु दु। थुकिं ला नेतात अझ नं संविधानसभाया म्याद हानं थपे यायेगु नियत ज्वनाः च्वनाच्वंगु दु धइगु स्पष्ट जूगु दु।

More Stories Like this