इनाप थ्व हे जुइ

नर्मदेश्वर प्रधान

पलिस्थां कविता गोष्ठी यायेत्यंगु दु । कविता छपु माल । अनुरोध वइ । कविता छपु च्वया । बिया । कविताया मू बिचाः थथे खः ।

देश वारीं पारी वनेत्यंगु । जेब्राक्रस पुलाः । तापाकं छगः गाडि तीव्र गितं हइ । जेब्राक्रसय् देयात क्यली । देय् दुर्घटनाग्रस्त जुइ । गाडी बाय्क याइ । उपचार स्वयां स्यायेगु कति लाइ । कविता थ्व हे घटनाय् केन्द्रित जुइ ।

कविता कपोलकल्पित मखु । अतिराजना थुकी भ्याःभति हे मदु । न्हियान्हिथंया जिगु भोग अनुभूतियात कविताय् हये । नुगलय् च्वंगु उकुसमुकुस पिल्ह्वये । मनय् सन्तोष लुइ ।

ज्या दइ । पिहां वये । न्हियान्हिथं थें लँ क्रस यायेमाः । लँय् मोटर मोटरसाइकल दयाच्वनी । मदिक । लँ क्रस याये अःपुइ मखु । सतर्क जुइ । होश याये । लँ क्रस यायेबलय् जेब्रा क्रस लुमंके । छ्यले । लाःलाःथासं मवना । जेब्राक्रस लँजुवाःतय् लँ । क्रस यायेत । थनं वये-वने यायेमाः लँ क्रस यायेबलय् । थ्व नियम जुइ । लँजुवाःतसें होश यायेमाःगु । नालेमाःगु । जेब्राक्रस छँलेमाः । लँजुवाःत अले सुरक्षित जुइ । जेब्राक्रसय् लँजुवाःतय्गु गाडीतसें सम्मान यायेमाः । गाडी दिकेमाः । जेब्रक्रसय् लँ क्रस यायेगु अवसर बीमाः । नियम थथे खः । तर व्यवहारय् ठीक थ्वया अःखः जुइ । लँ क्रस यायेत स्वये । जेब्राक्रसय् पलाः तये । म्हय् जिउ दइ मखु । च्वं क्वं गाडीत ब्वाका हइ । मिखा तिसिना । छु जेब्राक्रस । छु लँजुवाः । छुं मतलब तइ मखु । जेब्राक्रस छ्यलां छु याये । ब्वाकाहःगु मोटर गाडीतसें छ्यं च्वं हे ब्वाकाः यंकी ला ! क्यली ला थें जुइ । अन हे छुं जुइ ला । चिन्ता जुइ । भाग्यं जक बचे जुल । पारी वनाः ताःहाकः सासः ल्हाये । छन्हु निन्हु वा छकः निकःया खँ मखु थ्व । न्हियान्हिथं लँ क्रस याये मालाच्वनी । व हे भय । वहे चिन्ता । असुरक्षा । स्वइत धायेगु । धयां सुनां न्यनी । जिगु जक भोग मखु थ्व । अल्याख लँजुवाःतय् जीवन थथे खतराय् जीवन मरणय् लानाच्वनी ।

मनूयात गाडीं क्यली । गाडी लिखतं हइ । हानं क्यली । इतिश्री यानाबी । माःगु जरिवाना पुली । गाडीवालातसें थथे म्वाःम्वाकं लँजुवाःतय्त स्याःगु दसूत दु । पीडित पक्षयात जीवनभर वासः यानाः ध्यबा फुकेया पलेसा स्यानाः हर्जना पुले । गाडीवालातय् नियत जुइ । लँय् दुर्घटना जुइगुया भय जक मखु । बाय्क यानाः स्याना बीगु खतरा नं दु । लुमं लुमं म्ह चें चें धाइ । न्हियान्हिथं पिहां वया च्वनेमाः । ग्यानां नं छु याये ! छेँय् कू नयाः च्वनेगु जुइ । ल्हाः तुति संतले व सम्भव जुइ मखु । लँ क्रस यायेगु । जिगु पीर जुयाबी । जि ला भचा फूम्ह । मचा वृद्धवृद्धा अपाङ्ग रोगीतय्त लँ क्रस यायेमाल कि गुज्वःगु समस्या जुइगु जुइ । गुलि जोखिम दइ ।

लँ क्रस यायेबलय्या जिगु पीर सन्त्रास । छेँय् च्वनाः गबलें कल्पना याये । ब्वाँय् वइच्वंगु गाडी मोटरसाइकलं थःत लुयायंकूगु क्यला थंकुगु ब्वयेका यंकूगु तन्द्रां हय् हय् काःवइ । दुर्घटनाया बिम्बं हाः काइ । मनय् ग्लानी जुइ । यथार्थय् लँजुवाः जनता खः । जेब्राक्रस जनसुरक्षाया प्रतीक । जनताया देसय् लँजुवाः जेब्राक्रसया सम्मान दइ । इज्जत दइ । उमि सुरक्षाया प्राथमिकता दइ । गाडी मोटरतसें धाक रवाफ क्यनाः लँजुवाःतय्त अन अपमान याये दइ मखु । जेब्राक्रसया अवहेलना याये फइ मखु ।

दुर्भाग्य ! लँजुवाःत थौं थन बलिया दुगुचा जुइ । जेब्राक्रस सम्भावित बलिवेदी । जनता गुगुं क्षणय् थन दुर्घटनाया शिकार जुइफु । मतिइ लुइ देश जनताया जुइ मफुनि । जनता थन निरीह तिनि । असुरक्षित तिनि । थ्वहे अनुभूतिं थःगु बिम्बयात छ्यलाः जिं कविता च्वया । मनय् तयां तये मफयेक दया वयाच्वंगु असन्तोष आक्रोशयात निकास बिया ।

देसय् सरकार हिली । माधवकुमार नेपाल प्रधानमन्त्री जुइ । जिं टिभीइ स्वया च्वना । माधवकुमार नेपाल प्रधानमन्त्री जुइ । छेँय् वनी । हर्षित परिवारं स्वागत याइ । वृद्ध अबुं ह्याउँगु सिन्हः तिकी । कला काय् म्ह्याय् परिवारजनय् लय्ताः बाः वइ । माधवकुमार नेपालया गःपः स्वामांलं जाइ । अबिरं म्ह छम्हं ह्याउँइ । तस्वीर कायेगु सुरु जुइ । परिवारजनतलिसे किपा काइ । देशया प्रधानमन्त्री जूगु । थ्व चीधंगु खँ मखु । परिवारयात लय्तायेकेगु थ्व महान् अवसर खः । भाजु माधवकुमारया छेँय् थः पार्टीया शुभचिन्तकत नं वइ । बधाई बी । पार्टीया नेता कार्यकर्तात लय्ताइगु नं स्वाभाविक खः । टिभीया न्ह्यःने च्वनाः दृश्यत स्वये । मतिइ खँ लुइ । परिवार गुलि हर्षित । पार्टी लय्ताः । थःथःगु स्तरय् थ्व स्वाभाविक खः । तर माधवकुमार नेपाल देशया प्रधानमन्त्री नं खः । परिवार पार्टी जक मखु देय् नं लय्ताय् खनेमाः । देयात नं हर्षित जुइगु अवसर दयेमाः ।

जिगु सांकेतिक कविता लुमनी । जि भुनुभुन हाले । वारीं पारी वनेत स्वःम्ह देय् जेब्राक्रसय् दुर्घटनाग्रस्त जुइ । प्रम माधव-कुमार नेपालजु ! छिं थ्व खँ सिउ ला कि मसिउ थौं जेब्राक्रसय् देश घायल । जेब्राक्रसत बिल्कुल असुरक्षित । लँजुवाः जनतां पलाः न्ह्याके ग्याः थ्व जेब्राक्रसय् । गुगु इलय् नं क्यलेफु जनता थ्व जेब्राक्रसय् । प्रमजु जिपिं लँजुवाःतसें ततःधंगु विकास मफ्वना छिके । विलाशिताया आशा मयाना । न्हियान्हिं वये-वने यायेगु जिमिगु जेब्राक्रस सुगम जुइमाः । सुरक्षित जुइमाः । नागरिक सर्वोच्चताया प्रतीक खः थ्व जेब्राक्रस नं । वइगु मर्यादा संरक्षित जुइमाः । छिगु उदयया थ्व घडीइ लँजुवाःतय् इनाप छितः थ्व हे जुइ ।

More Stories Like this