एकता दिवस हनेत मोटरसाइकल र्याली
येँ(सन्ध्या टाइम्स)/थ्वहे वइगु पुस १८ गते हनेत्यंगु नेवाः एकता दिवस ताःलाकेगु लागिं नेवाः जागरण मञ्चं आः वइगु शनिवाः छगू मोटरसाइकल र्याली पिकयाः प्रचार याइगु जूगु दु। शनिवाः सुथय् ९ बजे थनया क्षेत्रपाटीइ मुनाः पिकाइगु उगु मोटरसाइकल र्यालीं स्वनिगःया थीथी लागा चाःहिलीगु खँ धाःगु दु। मञ्चं र्याली ब्वति कायेत सकसितं इनाप याःगु दु।
थ्वहे झ्वलय् १८ गतेया एकता दिवस सफल यायेगु लागिं नेवाः स्वायत्त राज्य मंकाः संघर्ष समितिपाखें थीथी थासय् थीथी ज्याझ्वः याना वयाच्वंगु दु। थौं सुथय् बलम्बु व तोखाय् विशेष भेला यानाः ज्याझ्वः बारे कनेगु ज्या जूगु खः।
