लुम्बिनी भ्रमण वर्षयात चीनय् ज्याकू

येँ(सन्ध्या टाइम्स)/सरकारं घोषणा यानातःगु लुम्बिनी भ्रमण वर्षया बारे युवक बौद्ध मण्डलया ग्वसालय् छगू अन्तर्क्रिया ज्याझ्वः जुल। लुम्बिनी विकास कोषया छ्यांज्ये राजेन्द्र थापा मगर मूपाहां कथं झाःगु उगु ज्याझ्वलय् न्ववासें भाजु मगरं लुम्बिनीया विषयय् छगू डकुमेन्ट्री नं तयार जुइधुंकूगु खँ कनादिल। भारतय् दयेकाच्वन धाःगु नकली लुम्बिनीया आलोचना मयासे नेपाःया लुम्बिनीया प्रचार यायेगुपाखे लगे जुइमाः धासें वय्कलं धार्मिक व पर्यटनया लागि जक लुम्बिनीयात केन्द्रित मयासे कुदान, रामग्राम, देवदह लगायत मेमेगु थासय् नं अवलोकन याकेमाःगु व भ्रमण वर्षयात ध्यबा कमे यायेगुली जक सीमित मयासे लुम्बिनीयात व्यापक प्रचार प्रसारय् यंकेमाःगु खँ कनादिल।
लुम्बिनी भ्रमण वर्षया निंतिं चीनया राजधानी बेइजिङं आपालं तिर्थयात्री वयेत्यंगु जूगुलिं बेइजिङय् नं छगू ज्याकू चायेकेत्यंगु खँ वय्कलं कनादिल।
ज्याझ्वलय् बौद्ध विद्वान लोकबहादुर शाक्यपिंसं तयादीगु न्ह्यसःया लिसः नं वय्कलं बियादीगु खः।
यलया लोककीर्ति महाविहारय् ग्वसाः खलःया नायः सुरेन्द्र शाक्यया सभापतित्वय् न्ह्याःगु उगु ज्याझ्वलय् ग्वसाः खलःया पुलांम्ह न्वकु चन्द्रमान शाक्यं लसकुस यानादीगु खः। थुकिया लिसें ग्वसाः खलःया मूछ्यांज्ये बुद्धरत्न शाक्यं पञ्चशील प्रार्थना लिसें बुद्ध पुजा नं याकादीगु खः।