भिक्षुद्वय अश्वघोष व कुमार काश्यपयात हना

येँ(सन्ध्या टाइम्स)/नेपाःया नव संघनायक भिक्षु अश्वघोष महास्थवीर व नव उपसंघनायक भिक्षु कुमारकाश्यप महास्थविरयात वंगु आइवतवाः छगू ज्याझ्वःया दथुइ स्वयम्भुया भुइँख्यलय् आनन्द भुवन विहारं हन।
विहारया उपासक, उपासिकापिनिगु मंकाः ग्वाहालिं नेपाःया स्थवीरवाद बुद्धशासनया खुम्हम्ह संघनायक व उपसंघनायक जुयाच्वनाबिज्याःपिं वसपोलपिंत हनेज्या याःगु खःसा हनेज्याझ्वलय् उपसंघनायक भिक्षु कुमारकाश्यप धाःसा उपस्थित जुयामदी। ज्याझ्वलय् लुम्बिनी बौद्ध विश्वविद्यालयया उपकुलपति प्रा.डा. त्रिरत्न मानन्धरं भिक्षु अश्वघोषयात अभिनन्दन पत्र नं लःल्हानादीगु खः।
ज्याझ्वःया दथुइ प्रा.डा. मानन्धरं विहारया नियमित लय्पौ बौद्ध पत्रिका अमृतोपदेश प्रकाशनया निंतिं उत्कृष्ट लेख, रचना उपलब्ध याकेगुलिसें थीथी कथं योगदान बियादीपिंत बीगु यानाच्वंगु अमृतोपदेश सिरपा २०६७/६८ नं लःल्हानादीगु खः।
२०६७ सालया थुगु सिरपाः भिक्षु सुमेध महास्थवीर, अशोक बज्राचार्य व गौमतवीर बज्राचार्यं व २०६८ सालया भिक्षु अश्वघोष महास्थवीर, विद्यासागर तुलाधर व संघमित्रा उपासिकापिंत बिउगु खः। उगु हे ज्याझ्वलय् भिक्षु संघरक्षित स्थवीरं च्वयादीगु 'मर्नु पर्छ है' नांगु बुद्ध शिक्षा सम्बन्धी सफू नं भिक्षु अश्वघोषं पिब्वज्या यानाबिज्याःगु खः। उगु सफू स्व. तीर्थबहादुर शाही व स्व. राजकुमारी शाहीयात देछानाः वय्कःया छेँजःपिंसं धर्मदान यानादीगु खः। ज्याझ्वलय् न्ववानादिसें भिक्षु अश्वघोषं बुद्ध शासन न्ह्याकेत ६३ दँ न्ह्यः हे थः भिक्षु जुयागु व थुकिया हे झ्वलय् आः धाःसा ज्येष्ठताया हिसाबं संघनायक जुइधुंकाः अभिनन्दन व हंगु ज्याझ्वलं थम्हं बुद्ध शासनया लागि यानागु योगदानयात लुमंका बिउगु खँ कनाबिज्यात। वसपोलं मनूतय्गु प्रशंसा प्राप्ति व निर्वाण प्राप्तिया लँ बिस्कं बिस्कं हे जूगु बुद्धया वचन नं लुमंकाबिज्यात।
ज्याझ्वलय् भिक्षु संघरक्षितं थः गुरु व आनन्द भुवन विहार व अमृतोपदेश पत्रिकाया धर्मानुशासक तकं जुयाबिज्याःम्ह भिक्षु अश्वघोषयात सार्वजनिक रूपं सम्मान याये दुगुलिं लसता प्वंकाबिज्यात।
ज्याझ्वलय् उपकुलपति प्रा.डा. मानन्धरं लुम्बिनी विश्वविद्यालय सभाया दुजः तकं जुयाबिज्याःम्ह भिक्षु अश्वघोषया नेपालय् थेरवाद बुद्ध धर्मयात न्ह्याकेत तःधंगु योगदान दुगु खँ कनादिल।
विहार अन्तर्गतया गोष्ठी समितिया उपाध्यक्ष प्रा. रत्नमान डंगोलं लसकुस यानादीगु उगु ज्याझ्वलय् विहार अन्तर्गतया बुद्ध धर्मया आधारभूत शिक्षा समितिया सचिव भावना बज्राचार्यं सुभाय् बियादीगु खः।