घः थिउम्ह दलितयात दायेवं राजमार्ग बन्द
येँ(सन्ध्या टाइम्स)/सार्वजनिक हितिइ छम्ह गैर दलितया घः थिल धकाः तनहुँया छम्ह मिसाम्ह दलितयात स्थानीय मनूतय्सं दाःगु विरोधय् थौं सुथंनिसें दलिततय्सं अनया राजमार्ग बन्द याना बिल।
इमिसं दोषीयात कडा कारवाही यायेमाःगु माग यासें राजमार्ग बन्द याःगु खः। नेपाल दलित संघ नापं दलिततय्गु थीथी पुचः जानाः उगु बन्द याःगु खः। सुरुइ सुथय् १ घण्टा जक बन्द यायेगु धाःसां न्हिनय् आपालं दलित मुनेवं दोषीयात कारवाही मयाःतले अनिश्चितकाल बन्द यायेगु धकाः सतकय् प्रदर्शन याःगु खः। थुकिं यानाः दमौलीया राजमार्ग अबरुद्ध जूगु दु।
तनहुँया घासिकुवा लागाय् बालं च्वनीम्ह माया विश्वकर्मायात स्थानीय मनूतय्सं लः फयेत हयातःगु घलय् थिल धकाः दाःगु खः। दायाः घाःपाः जूम्ह विश्वकर्मायात २० घण्टा लिपा जक म्हिगः अस्पताल भर्ना याःगु खः। उकिया विरोधय् दलित संघ संस्थातय्सं पृथ्वी राजमार्ग बन्द याःगुलिं पोखरां येँय् वये वने याइगु गाडीत दमौलीइ हे थानाच्वंगु दु।
दलित हत्याया विरोधय् पाल्पा बन्द
मेखे कालिकोटया छगू होटलय् भुतू थिल धकाः दायाः सीम्ह मनवीर विकयात सहिद घोषणा यायेमाः धइगु माग यासें दलित संघ संस्थातय्सं थौं पाल्पा बन्द याःगु दु। बन्द यानाः थौं सुथंनिसें अनया जनजीवन प्रभावित जूगु दु। थ्वहे झ्वलय् थौं सुथय् च्वंगु मन्त्रिपरिषद् बैठकं सीम्ह मनवीरया छेँजःयात १० लाख तका दां बीगु निर्णय याःगु दु।
