लुम्बिनी, वान की मुन व वय्कःया मां

येँ(सन्ध्या टाइम्स)/माओवादी अध्यक्ष पुष्पकमल दाहाल 'प्रचण्ड' थौंकन्हय् माओवादी त्वःताः बुद्धवादपाखे लगे जूगु द्वपं स्वयम् वय्कःया हे पार्टी दुने बियाहःगु दु। प्रचण्डं धाःसा बुद्ध जन्मभूमि लुम्बिनी विकासया लागिं चीनया छगू नांजाःगु संस्था जक मखु संयुक्त राष्ट्र संघया महासचिव वान की मुनयात समेत संलग्न यायेधुंकूगु दु। प्रचण्ड ला बुद्ध थःगु हे देशय् जन्म जूगुलिं लगे जुल धाये तर राष्ट्र संघया महासचिव मुन छाय् लुम्बिनी विकासय् थुकथं इच्छुक जुयादिल ले? थुकिया धाःसा मेगु हे बाखं दु।
दक्षिण कोरियाली नागरिक मुनं थःत बौद्धमार्गी मधाःसां वय्कःया मां धाःसा छम्ह कट्टर बौद्ध धर्मालम्बी जुयाच्वन। मुन राष्ट्र संघया महासचिव नियुक्त जुइवं वय्कलं थः मांया लागिं छु ज्या याये फइ धकाः न्यंबलय् मामं धयादिल, 'बुद्ध धर्मया ख्यलय् छुं बांलाःगु ज्या याःसा जितः यः।'
वयां लिपा मुनं थ्व ख्यलय् छुं यायेफुसा याये धकाः मनय् तयादीगु जुयाच्वन। थ्वहे झ्वलय् नेपाःया लुम्बिनी विकासया खँ न्ह्यःने वल। लुम्बिनी विकासय् राष्ट्र संघयात नं संलग्न यायेगु कुतः न्हापा माधव नेपाल प्रधानमन्त्री जुयाच्वंगु इलय् हे न्ह्यानाच्वंगु खः। तर वय्कःया सरकार क्वःदःगुलिं खँ न्ह्यःने मवन। थ्वहे दथुइ चीनया एपेक्स नांगु संस्थां लुम्बिनी विकासय् तःधंगु लगानी यायेगु तयारी यानाच्वंगु समाचार पिहां वल। उकिया हे झ्वलय् मुनयात नं थुकी सामेल यायेगु खँ जुल। लुम्बिनी विकासया लागिं ऊ थान्तं न्हापा कुतः याःगु खःसा आः थः एशियापाखें राष्ट्र संघया महासचिव जूम्ह निम्हम्ह व्यक्ति जूगुलिं थम्हं नं थ्व ख्यलय् छुं ज्या याये धइगु उत्साह भाजु मुनं क्यनादीगु दु।