प्रचण्डयात हाथ्या बीगु प्रस्ताव

केन्द्रीय कमिटीइ बैद्य पक्षया कडा प्रस्तुतीया तयारी
येँ(सन्ध्या टाइम्स)/एकीकृत माओवादीया थौं च्वनीगु केन्द्रीय बैठकय् बरिष्ठ उपाध्यक्ष मोहन बैद्य किरण पक्षं पार्टी अध्यक्ष प्रचण्डयात तप्यंक हाथ्या बीगु कथंया प्रस्ताव यंकीगु जूगु दु।
प्रचण्डं पार्टीइ पेश याःगु प्रस्तावयात संशोधनवादी, आत्मसमर्पणवादी जूगु द्वपं बिसें वैद्यं जन विद्रोहया प्रस्ताव यंकेगु तयारी याःगु दु।
पार्टीया केन्द्रीय ज्याकू कोटेश्वरया पेरिसडाँडाय् च्वंगु उगु बैठकय् ब्यागलं कथंया प्रस्ताव यंकेगु नितिं माःगु तयारी यायेत थौं सुथय् किरण पक्षधर केन्द्रीय नेतातय्गु ब्यागलं बैठक च्वंगु खः।
थौं च्वनीगु केन्द्रीय कमिटीया बैठकय् थःपिं कडा रुपं प्रस्तुत जुइगु खँ बैद्य पक्षया नेतातय्सं धाःगु दु। प्रचण्ड जक मखु पार्टीया उपाध्यक्ष प्रधानमन्त्री लिसें डा. बाबुराम भट्टराईयात तकं तसकं आलोचना यायेगु कथंया प्रस्ताव बैद्य पक्षं यंकेगु तयारी याःगु दु।
पार्टीया निर्णय अःखः थीथी शिविरय् च्वंगु कन्टेनरया ताःचा लःल्हायेगु ज्या याःगु, दलाल व पुँजीपतितय्गु हित जुइगु कथं सरकारं ज्या याःगु धकाः प्रधानमन्त्रीया कडा आलोचना यायेगु तयारी बैद्य पक्षं यानाच्वंगु दु। प्रचण्डं शान्ति व संविधानया नितिं सेना समायोजन पूवंकेगु, इलय् हे संविधान निर्माण यायेगु, आः थत्थें हे जनविद्रोहया संभावना मदु धकाः केन्द्रीय कमिटीया बैठकय् थःगु प्रतिवेदन न्ह्यब्वये धुंकूगु दु।
बैद्य पक्षं पालुङटारया विस्तारित बैठकया भावनाया अःखः आःया नेतृत्व वंगु ठहर यानाः पालुङटारया भावना कथं जनविद्रोहया लाइन ज्वनाः वनेमाः धकाः ब्यागलं कथंया प्रस्ताव यंकेत्यंगु खः। उगु प्रस्तावया नितिं बरिष्ठ उपाध्यक्ष मोहन बैद्य किरण, महासचिव रामबहादुर थापा बादल, सचिव सीपी गजुरेल लगायतया नेतातय् दथुइ व्यापक रुपं सहलह ब्याकूगु खः। इमिसं वर्तमान सरकारया थासय् राष्ट्रवादीतय्गु मंकाः सरकार दयेकेमाः धकाः तकं प्रस्ताव यंकीगु खँ छम्ह नेतां कनादीगु दु।
बैद्य पक्षया नेतातय्सं थःपिनि तयारी मगाःगुलिं धकाः म्हिगः च्वनेमाःगु केन्द्रीय कमिटीया बैठक छन्हु लिछ्याके बिउगु खः। एकीकृत माओवादीया थुगुसी तःक्वःमछि हे लिछ्यानाः जू वनाच्वंगु केन्द्रीय कमिटीया मुँज्यां छु गज्वःगु निर्णय याइ उकिया लिच्वः संविधान निर्माण नापं शान्ति प्रक्रियाय् तकं लाइगु जुयाः राजनीतिक ख्यलं थुकी तःधंगु चिउताः तयाच्वंगु दु।