न्ह्यलं चाय्वं
पामिला
म्हगसय् जाय्क छ वल
खिति खिति न्हिला
पुत्तु पुला ।
तीजक, वास्याहा............
बुलुक्क ख्वाः क्यं क्यं,
न्हाय्कनय् थें ल्याजिकः वल ।
देँ देँ पुलांम्ह सां ।
न्हूम्ह जुया वःथें वल ।
गाक्क गाक्क लुमंके बिया,
मांया मतिना जाय्का ब्यू वल ।
तापाक्क च्वना खः खैं,
मू हे मेगु जुइका बिल ।
नाप हे दःसां, छ, छ हे खः
अय्नं तापाःगुया
महसुस,थौं ताय्का ब्यू वल ।
छं नं ताय्का च्वंगु जुइ,
"छाय् खः थ्व मामं,
सत्तिक्क दः मतल ? "
व नं थुइकल जुइ,
"छुं सय्के सीके माल हे !"
थुइकेगु कुतः छंके दइमखुनी,
वला जिं नं थू ।
अयनं ध्वादः पहः जिं क्यनाच्वना,
मांनाप च्वनेगु इलय् नं
तापक्क छन्त तया ।
बाध्यता,
छ नाप बाया च्वनेमाःगु जिगु ।
खः,
गनं स्वार्थया नताः वइगु
अवश्य छं थुइकु थें हे खः
ताः
थ्व नं खः
व स्वार्थ लिसे छुं किकाः
मांया मतिनालिसें ल्वाकछ्याना
छन्त हे इनाच्वनागु दु ।
व छं थुइमखुनी सायद,
अयनं कत्तुकुला च्वना ।
थुलि खँ धयाच्वना छन्त,
छाय्की छ बुरा नं खः ।
कार्टुन स्वय्गु बखतय् नं
हना प्याखँ, सिरियल स्वय्माःम्ह छ
बाखँ बाखँ थुइकीम्ह छ ।
वला जिगु भ्रम नं जुइफु,
छ बुरा नवःगुया आभाष ।
खः छ मचा हे खः
जिगु मुलय् द्यने मगानीम्ह ।
अयनं छन्त पितीना जिं,
थ्व कत्तिका तय्माःगु ल्हाःपाः फ्यनाः
ताः
न्ह्यबलय् छ जि लिक्क दु
थ्व नुगःचुया दथुइलाक्क हे
थ्व जिगु हिनुहिनुलय् हे ।
उकिं थौं म्हना च्वंगु,
न्ह्यलं चाय्वं स्वय् आय्बुइक हे ।
Related Stories
भविष्य पियाच्वनेगु झ्वलय्More Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
