आः सिंहदरवार बन्द यायेगु
राज्ययात नेपालमण्डलया नेवाःतय् ख्याच्वः
येँ / (सन्ध्या टाइम्स) यदि आः नं नेवाः स्वायत्त राज्य बीगु ज्याय् सुनां नं पंगः थन धाःसा नेवाःतय्सं नेपालमण्डल मखु नेपाःया सरकार संचालन जुइगु सिंहदरवार व संविधान दयेकीगु थाय् संविधान सभा हे बन्द याना बीगु ख्याच्वः नेवाः न्ह्यलुवाः मल्ल के. सुन्दरं बियादीगु दु । म्हिगः ऐतिहासिक रुपं सफल जूगु नेपालमण्डल बन्द लिपा बसन्तपुली जूगु सभाय् न्ववासें वय्कलं थ्व खँ धयादीगु खः । बन्द नेवाःतय्त नं यःगु मखु धासें वय्कलं नेवाःतय् सः न्यनीपिं शासकतय् न्हाय्पं व मिखा बन्द जुयाच्वंगुलिं थःपिंसं नं बन्द ज्याझ्वः यायेमाःगु खः धयादिल ।
नेवाः स्वायत्त राज्य मंकाः संघर्ष समितिया नायः व राष्ट्रिय मुक्ति मोर्चाया नं नायः हितमान शाक्यं बन्द ज्याझ्वःपाखें मंकाः मागया लागिं फुक्क नेवाःतय्त छथाय् तयेगु ज्या जूगु दु धयादिल । मोर्चाया न्वकु हिसिला यिमं येँया विकास संघीय व्यवस्थां जक जुइ धासें थःपिंसं वहे संघीयताया लागिं सरकार समेत त्वःता वयागु खः धयादिल ।
नेपाः राष्ट्रिय ल्याय्म्ह न्ह्यलुवाया नरेशवीर शाक्यं नेपालमण्डल बन्द भव्य रुपं सफल जूसां नेवाः आन्दोलन सफल मजूनि नेवाः स्वायत्त राज्य पलिस्था मजूतले नेवाः आन्दोलन पूवनी मखु धयादिल ।
नेवाः जागरण माचया संयोजक सुजीव वज्राचार्यं नेवाःतय् समाचार बहिष्कार याईपं साचार माध्यमतय्त नेवाः प्रदेशं पितिना छ्वयेमाः धकाः माग यानादिल ।
बन्द लिपा बसन्तपुलिं पिहां वःगु जुलुसं देय् चाःहिलेधुंकाः अन हे थ्यंकाः सभा याःगु खः ।
(किपा - उदेन न्हूसाय्मि)
