नेवाः राष्ट्रिय मुँज्यापाखें येँ घोषणा जारी

येँ (सन्ध्या टाइम्स)/नेवाः देय् दबूया ग्वसालय् म्हिगः व म्हीग निन्हुयंकं जूगु राष्ट्रिय मुँज्यां येँ घोषणा जारी याःगु दु। देय्न्यंकंया नेवाःतय्गु प्रतिनिधित्व दुगु उगु राष्ट्रिय मुँज्यां नेवाः स्वायत्त राज्य सुनिश्चित जुइमाःगु, प्रस्तावित नेवाः प्रदेशय् स्वनिगः जःखःया नेवाः बाहुल्यता दुगु बस्तीयात नं दुथ्याकेमाःगु नापं नेवाः प्रदेश पिनेया नेवाःतय्गु निंतिं मेमेगु प्रदेशय् समानुपातिक प्रतिनिधित्व जुइमाःगु नापं इलय् हे न्हूगु संविधान जारी यायेमाःगु लगायतया खँ दुथ्याकातःगु दु ।

थ्वहे दथुइ देय् दबूपाखें जारी याःगु घोषणापती धयातःगु दु, 'धर्म निरीपेक्ष, लोकतान्त्रिक संघीय गणतन्त्र नेपाः देय्यात संस्थापना यायेत दयेकाच्वंगु संविधानय् संयुक्त राष्ट्र संघं प्रत्याभूत यानातःगु अधिकारया आधारय् नेवाःतय्गु भाषिक, सांस्कृतिक, राजनीतिक, आर्थिक व प्राकृतिक श्रोतय् अग्राधिकार व आईएलओ १६९ या आधारय् आत्मनिर्णयया अधिकार सहितया नेवाः स्वायत्त राज्य प्रत्याभूत यानाः दकलय् लिपा क्वःछिउगु ईया दुने हे संविधान पिथनेमाः' धकाः न्ह्यथनातःगु दु ।

अथे हे 'संविधानसभाया राज्य पुनःसंरचना व राज्य शक्ति बाँडफाँड समितिं न्ह्यब्वःगु १४ गू प्रान्तया प्रस्ताव खः, उकी नेवाःतय्गु भाषिक, साँस्कृतिक व जातीय पहिचानया लिधंसाय् नेवाः प्रदेश नं दुथ्याकाः पिब्वःगु प्रस्तावयात लसकुस यासें ऐतिहासिक ल्याखं नेवाःतय् बाहुल्यता दुगु गुलिखे लागाः प्रस्तावित नेवाः प्रदेशय् त्वःफिउगुलिं उगु त्वःफिउगु लागायात नेवाः प्रदेशय् दुथ्याके माःगु, नेवाः प्रदेश पिने च्वंपिं नेवाः समुदायया स्वायत्त इलाका नीस्वने नापनापं फुक्क नीति निर्माण तहलय् समानुपातिक व समावेशीय प्रतिनिधित्वया सुनिश्चितताया निंतिं दवाव व प्रभाव ब्वलंकेगु निंतिं माःगु इलय् माःकथं सघर्षया पलाः ल्ह्वनेत' नेवाः देय् दबूनाप आवद्ध देय् नेवाःतय्गु संघ संस्थाया प्रतिनिधिपिंसं मंकाः प्रतिवद्धता प्वंकातःगु दु ।