लोडशेडिङ्गया विकल्प मालाः छवाःया दुने पेस यायेत सरकारयात निर्देशन
येँ (सन्ध्या टाइम्स)/व्यवस्थापिका संसदया सार्वजनिक लेखा समितिं लोडशेडिङ्ग अन्त्य यायेगु विकल्प न्हय्न्हुया दुने पेस यायेत सरकारयात निर्देशन बिउगु दु। समितिं लोडशेडिङ्ग अन्त्य यायेगु विकल्प छवाःया दुने पेस यायेत उर्जा मन्त्रालय व विद्युत प्राधिकरणयात निर्देशन बिउगु खः। समितिं वैकल्पिक उर्जा स्रोत म्हसीकाः लोडशेडिङ्ग अन्त्य यायेगु कुतः यायेत नं सरकार व सम्बन्धित निकायया ध्यानाकर्षण याःगु दु ।
सरकारं लोडशेडिङ्ग क्वपालेगु निंतिं छगू जक विकल्पया रुपय् दुगु थिकेगु थर्मल प्लान्ट हयेगु तयारी यानाच्वंगु इलय् संसदया लेखा समितिं उर्जामन्त्री, उर्जा सचिव, प्राधिकरणया पदाधिकारीत नापं सहलह ब्याकूगु खः। समितिं सम्बन्धित पक्ष नापं याःगु सहलह लिपा सरकारं हयेगु तयारी याःगु थिकेगु डिजेल प्लान्टं उत्पादन जुइगु मत तसकं थिके जूगुलिं उकिया विकल्प मालेत सरकारयात सुझाव बिउगु खः ।
समितिं जूगु सहलह मुँज्याय् उर्र्जामन्त्री पोष्टबहादुर बोगटीं लोडशेडिङ्ग म्हो यायेत हे थिकेगु जक मखसे खराब जूसां डिजेल प्लान्ट हयेगु निर्णय यायेमाःगु दावी यानादिल। समितिया दुजःपिंसं धाःसा उर्जा संकटया मेगु विकल्प ममासे डिजेल प्लान्ट हयेबलय् प्राधिकरणयात तकं खतराय् लाइगु बिचाः प्वंकूगु खः। सुयातं निगः प्यंगः अप्वः कमिसन नकेगु लागिं जनतायात दुःख जुइगु ज्या मयायेत नं समितिया दुजःपिंसं सचेत याःगु खः ।
आकिवं नीछघौ लोडेशेडिङ्ग
थ्व हे झ्वलय् उर्जामन्त्री बोगटीं आः थेंज्याःगु हे अवस्था कायम जुयाच्वन धाःसा आकिवं न्हिं नीछघौ तक लोडशेडिङ्ग जुइगु खँ धयादीगु खः। लेखा समितिया बैठकय् जूगु सहलहया झ्वलय् अल्पकालीन व दीर्घकालीन विकल्प नाला मकायेगु खःसा आकिवं नीछघौ तक लोडशेडिङ्ग जुइगु खँ धयादीगु खः ।
राजनीतिक सहमति यानाः छगू निश्चित योजना दयेकाः मवनेगु खःसा लोडशेडिङ्ग नं म्हो जुइगु सम्भावना मदुगु मन्त्री बोगटीं दावी यानादीगु दु। वय्कलं आकिवं गुलि ई लोडशेडिङ्ग जुइ धकाः बिचाः यायेगु स्वयां गुलि ईतक मत वइ धइगु धलः दयेकेमाःगु नं वय्कलं धयादीगु दु। लोडशेडिङ्ग म्हो यायेत भारतं २०० मेगावाट मत न्यायेगु सैद्धान्तिक सहमति जूसां प्राविधिक समस्या जुयाच्वंगु समितियात जानकारी बियादीगु दु ।
