विराटया साहित्यकार

मधु श्रेष्ठ

नेपालभाषा ख्यलय् साहित्य सम्मेलन ला इलय्ब्यलय् जुयाच्वंगु हे दु तर न्य्यदँ न्ह्यवंनिसें दँय्दसं मदिक्क जुया वयाच्वंगु साहित्य सम्मेलन धाःसा विराट नेपालभाषा साहित्य सम्मेलन छगू हे जक खः। थ्व दँय्दसं ख्वपय् जुइगु सम्मेलन खः। आः तक न्यय्क्वः जुइधुंकूगु थ्व सम्मेलनय् झिंछकः तक ब्वति कयाः न्ह्यक्वः तक सिरपाः कायेत सफल जूम्ह साहित्यकार खः भाजु तिर्थभक्त थकू। विराटया साहित्य सम्मेलनय् वय्कः दकलय् अवः ब्वति कयाः दकलय् अप्वः सिरपाः त्याकादीम्ह साहित्यकार खः ।

थन ख्वीनिदँ न्ह्यः ख्वपया दत्तात्री तचपा त्वालय् भाजु गजब सिंह थकू व मय्जु सन्तु थकूया कोखं भाजु तीर्थ भक्त थकूया जन्म जुल।वय्कःया पूर्वज येँ मखंत्वाःया तारिणी बहालय् च्वंपिं खःसां अथे हे स्वसःदँ ति न्ह्यः वय्कःया बाज्या अजापिं ख्वपय् च्वंवंगु जुयाच्वन। वय्कः न्हापा नेपाल बैंक लिमिटेड न्हू सडकया मेनेजर खः। २०४७ सालपाखे स्वेच्छिक अवकाश कयादिल। छुं ई नेपाल ब्यापार विकास कम्पनीया जनरल मेनेजर जुयाः ज्या यानादिल। अनं लिपा कलकत्ता झाल। ब्यापार यानादिल। थौंकन्हय् वय्कः नेपाल इन्टरनेसनल प्याक एण्ड टेरडिङ इन्डष्ट्रिज प्रा.लि.येँया डाइरेक्टर (सञ्चालक) खः। पेशां ब्यापारी खःसां सहित्यया रुचीं धाःसा वय्कः ब्यागलं च्वनेमफु। धयादी, 'नेवाः भाय्या कोर्स गबलें नं ब्वनागु मदु। कलेजय् राजनीतिशास्त्र विषय ब्वनागु खः। तर थःगु मां भाय् ब्वनेहे माःगु आवश्यक नं मखना छाय्धाःसां झीसं छेँ जःपाखें अःपुक्क हे स्यनाकाये फइ। थ्व भासं साहित्य च्वये तसकं यः ।'

थौंकन्हय् देशय् लोकतन्त्र व गणतन्त्र वयेधुंकूगु दु। थःगु मां भाय् नेवाः साहित्य वा स्वायत्तताया लागि संघर्ष यायेगु न्हापाया तुलनाय् उलि थाकु मजू। पञ्चायतकालय् उकिसनं जुजु महेन्द्रया पालय् नेवाः साहित्य सिर्जना यायेगु अःपुगु ज्या मखु। थ्वहे सन्दर्भय् वय्कलं धयादी '२०२५/ २६ सालपाखे जुजु महेन्द्रया पालय् विराट नेपालभाषा सम्मेलनय् च्वसु ब्वं वने मते धकाः यक्व हे दबाब वल। अबलय् वय्कःयात विराटय् वन धाःसा जागिरय् लिच्वः लायेफु, च्वयेगु हे खःसा खँय्भासं च्व प्रमोशन यानाबी धकाः प्रलोभन तकं बिउ वःगु जुयाच्वन।
न्हापा भियतनामय् आन्दोलन जुयाच्वंगु इलय् वय्कलं अन जुयाच्वंगु अवस्था सम्बन्धि छपु लसकुस म्येँ च्वयाः विराटय् हायेकादिल। अज्याःगु म्येँ हायेके दइ मखु धकाः वय्कःया छेँय् तकं प्रहरी छ्वयाहःगु जुयाच्वन। अथे खःसां सुलाः सुलां जूसां सम्मेलनय् उगु म्येँ हायेके बियां त्वःतागु खँ वय्कलं लुमंकादी ।

विराट नेपालभाषा साहित्य सम्मेलनय् दकलय् अप्वः सिरपाः त्याकादीम्ह भाजु तिर्थभक्तं अबलय् अनुभव कनादी, 'सम्मेलनय् वनाः कविता ब्वनाबलय् उगु ईया न्ह्यलुवा साहित्यकारपिं चित्तधर हृदय, सिद्धिचरण श्रेष्ठपिंसं दबुलिं कुहां वयाः कविता बांलाः धकाः हानं च्वयेगु लागिं प्रोत्साहन बियादिल।' भाजु रामशेखरं ला ब्वनाच्वनागु च्वसु हे कयाः यंकादीगु खँ नं लुमंकादी। थुकिं यानाः वय्कःयात तसकं हे हौसला वःगु जुयाच्वन ।

विराट सम्मेलनय् दकलय् अप्वः ब्वति काःम्ह साहित्यकार खःसां थःत उकिया ल्याःचाः बारे धाःसा होश मदुगु खँ वय्कलं कनादी। थुगुसी विराटया न्यय्दँ बुन्हिया झ्वलय् विराटपाखें हे थुकिया जानकारी बीवं तिनि वय्कलं नं थुकिया बारे सीकादिल। वय्कःयात थम्हं विराटय् दकलय् न्हापां गबलें ब्वति कयागु धइगु नं लुमं मजू। थुगुसी विराटपाखें हे वय्कःया कविता सफू 'पासा' पिथंगु खः ।

नेवाः साहित्यय् यक्व सेवा यायेगु इच्छा दुसां यक्व च्वये मफुगु खँय् धयादी 'लजगाःया लागिं उखेथुखे वने मालाच्वनीगु जुयाः फुर्सद मदयाच्वनीगु, अथे खःसां इलय् ब्यलय् छुं न छुं च्वयेगु ला याना हे च्वना। थःके दुगु कवितात, च्वसुत गन वनी धकाः तया नं तइगु दु।' आः धाःसा वय्कःया छुं भतिचा फुर्सद दयावःगुलिं साहित्ययात हानं निरन्तरता बीत्यनागु खँ नं कनादिल ।

वय्कःया 'पासा' कविता मुना उकुन्हु तिनि पिहां वःगु खः। थुकी न्यय्च्यापु कविता दुथ्याः। मेगु पिहां वयेत्यंगु 'सर्गः', 'सिन्हःस्वां' आदि सफूत खः। समाजय् खने दयाच्वंगु विकृति अले विसंगतियात उजागर यायेगु ज्या साहित्यं याइ। थ्व झ्वलय् वय्कलं धयादी, 'साहित्य धयागु छेँय् छेँय् दयेमाः। अझ देश, विदेशय् तक नं थ्यंकेमाः अले झीसं मां भाय्यात धस्वाके फइ ।'

छम्ह साहित्यकार अले सफल व्यापारी जुयाः नं थःगु मांभाय् व साहित्ययात गुबलें नं न्हंके मजिउ, उकिया लागं थम्हं फुगु चाःगु ग्वाहालि यायेमाः धइगु भाजु थकूया बिचाः सकस्यां लागिं नालेबहः जू ।

More Stories Like this