पद बियाः विवाद समाधान यायेगु सूत्र

राजनीतिक पार्टी दुने नेतातय् दथुइ कायम विवाद समाधान यायेगु लागिं बिचार व सिद्धान्तय् समायोजन यायेगु सिबें नं पदया समायोजन यायेगु न्हूगु प्रवृत्ति सुरु जूगु दु। एमाले दुने अध्यक्ष झलनाथ खनाल व केपी ओली दथुया विवाद समाधान यायेत ओलीयात संविधानसभाया सभासद् दयेकेगु कुतः सुरु जूगु दुसा माओवादी दुने अध्यक्ष प्रचण्ड व उपाध्यक्ष मोहन वैद्य दथुया विवाद समाधान यायेगु लागिं वैद्य पक्षयात प्रधानमन्त्री दयेकेगु वा आःया हे सरकार दुने समावेश यायेगु प्रस्ताव न्ह्यःने वःगु दु। उखे नेपाली कांग्रेस दुने नं असन्तुष्ट जुयाच्वंम्ह शेरबहादुर देउवायात प्रधानमन्त्री दयेकल धाःसा अन दुनेया विवाद समाधान जुइगु संकेत पिहां वयाच्वंगु दु।
पद बियाः विवाद समाधान यायेगु थ्व ल्वय् एमाले व कांग्रेसया लागिं ला पुलांगु हे खः, आः थःत क्रान्तिकारी धाइगु पार्टी माओवादी नं थ्व सरुवा ल्वचं ग्रस्त जुइधुंकूगु लानाच्वन। उकिं प्रधानमन्त्री पद बिउसा वैद्य पक्षं शान्ति व संविधान निर्माणय् गुगु पंगः थनाच्वंगु खः उकियात चीके फइ धइगु आशा याना हःगु दु। पद बियाः विवाद समाधान यायेगु थ्व पहः छुं नं कथं स्वस्थकर मखु। न अज्याःगु समाधान टिकाउ हे जुइ। पद दत्तले टिके जुइ, पद मदयेवं हानं ल्वापु सुरु जुइ। थज्याःगु प्रवृत्तिं नेतातय्त सिद्धान्त, निष्ठा व विचारया आधारय् राजनीति यायेगु बानीपाखें तापाका बी अले बुलुहुँ बुलुहुँ पदलोलुप, भ्रष्ट व घृणायुक्त पात्र दयेका बी। नेपाःया राजनीति आः तक घृणित जुयाच्वंगुया मू कारण नं थ्वहे खः। न्हूगु नेपाः दयेके धाइपिं नेतातय्सं नं थुकियात चीके मफुगु दुर्भाग्यया खँ खः।

More Stories Like this