माओवादी मन्त्रीतय् कार्यदक्षता

सानुराजा शाक्य

नकतिनि निक्वःगु जनआन्दोलन क्वचाःगु ई। अन्तरिम सरकारया नेतृत्व नेपाली कांग्रेसया सभापति गिरिजा प्रसाद कोइरालां यानाच्वंगु उगु ई। माओवादी युद्ध त्वःताः शान्ति प्रक्रियाय् वयाच्वंगु उगु ई। माओवादी अन्तरिम सरकारय् दुमथ्याःगु तर फुक्क नेता कार्यकर्तात येँ केन्द्रित जुयाः खुल्ला राजनीतिइ वयाच्वंगु उगु ई। छगू कथं माओवादीप्रति आकर्षणया ई। उगु ईया सरकारं अन्तर्राष्ट्रिय ख्यलय् चिकंया भाः थहां वनाः नेपाःया आपूर्ति व्यवस्थाय् समस्या वयाच्वन धकाः चिकंया भाः थकाल। उगु ईया चिकं मन्त्री थौकन्हय्या सरकारय् दुथ्याःगु मधेसी नेतात हे खः। चिकंया भाः थकायेगु सरकारं चान्हय् याःगु निर्णयया विरोधय् उगु इलय् माओवादीं विरोध यात ।

विरोध जक मखु सतकय् द्वलंद्वः कार्यकर्ता क्वकयाः बन्द यासें सरकारयात चिकंया भाः क्वपालाः न्हापायागु हे कायम यायेत दवाव बिल। यक्व टायर च्याकल। वाइसिएलया कार्यकर्तातय्सं शहर फुक्क ठप्प याना बिल। लिपा सरकारं तत्कालया नितिं भाः थकायेगु निर्णय स्थगित याना बिल। उगु घटना क्वचाल। व धुंकाः थौंतक सरकारत यक्व हिलेधुंकल। उबलय् चिकंया भाः थकाये मफुसां थौंतकया दुने चिकंया भाः यक्व थहां वनेधुंकल।
लिपा लिपाया सरकारं तःक्वःमछि भाः थकाःसां लिपा बन्द विरोध प्रतिवाद खास हे मजुल। उगु इलय् चिकंया भाः थकाल धकाः तच्वकं विरोध याइपिनिगु नेतृत्व अर्थात माओवादीया नेतृत्वय् हे सरकार संचालन जुयाच्वंगु दु। नापं चिकं स्वइगु मन्त्रालयया मन्त्री नं छम्ह एकीकृत माओवादीया जिम्मेवार नेता लेखराज भट्ट जुयाच्वंगु थ्व इलय् लेखराजया न्वचु न्हिंन्हिं धइथें टिभीया समाचारय् खने दयाच्वनी चिकंया भाः थकाःसा जक आपूर्ति सहज जुइ उकिं सरकारं याकनं चिकंया भाः थकायेत्यंगु दु। छम्ह मन्त्री नं संवेदनशील वस्तु गुगु आपूर्ति सहज मजूयाच्वंगु इलय् भाः थहां वनीन धकाः सार्वजनिक रुपं न्ववाना जुइबलय् आपूर्ति व्यवस्थाय् गुकथं लिच्वः लाइ धकाः तकं मसिउ। म्हिगः तक भाः थकयाः मखु आयल निगमय् जुइगु अनियमितता न्हंकाः भाः समायोजन यायेमाःगु माग तइपिंसं थः मन्त्री जूबलय् आयल निगमय् जुइगु अनियमितता पनेगु स्वयां अःपुगु लँपु भाः थकायेगु जक धायेबलय् म्हिगः थःपिंसं यानागु संघर्ष मात्र सत्ताय् थ्यंकेगु स्वाहाने जक खः धइगु प्रमाणित मजूला? तर धन्य अर्थमन्त्रीं तत्कालया नितिं डेढ अरब आयल निगमयात सरकारं बियाः लच्छिया निंतिं समस्या ज्यंकेगु धाल। थ् हे यथास्थितिइ थ्व समस्या ज्यनीगु खने मदु। चिकंया आपूर्ति अझ नं सहज जूगु मदुनि। थुकथं चिकंया आपूर्ति सहज यायेगु मामिलाय् थ्व सरकारं लबः काये मफुनि अर्थात ज्या यानागु क्षमता क्यने मफुनि ।

चिकंया नापनापं मतया नं तच्वःगु समस्या दु। झलनाथ खनालया सरकार दुबलय् गोकर्ण बिष्ट उर्जामन्त्री जुयाच्वंगु इलय् मत क्वपालेगु (लोड सेडिङ) न्यून जुइधुंकूगु अवस्थां माओवादी नेतृत्वया सरकार उकिसनं उर्जा मन्त्रालय हे माओवादीया नेता पोष्टबहादुर बोगतीं न्ह्याकाच्वंगु इलय् लोड सेडिङ म्हो जुइगु ला गन गन वालय् ७० घण्टा थ्यन। थ्व अझ अप्वयाः न्हिं नीघौ तक थ्यनी धकाः फूर्ति साथ भाषण यायेगु याः। म्हिगः थःपिं विपक्षय् दुगु इलय् मन्त्रीतय्गु कार्य क्षमताया अभावं थ्व फुक्क समस्या वयाच्वन धकाः आरोप बी गुलि अःपु थः व थासय् च्वनाः ज्या यायेमाल धाःसा गुलि थाकु धइगु अनुभव सायद माओवादी मन्त्रीतसें थुइकाच्वन जुइ। जनतायात राहत बी धकाः घोषणा यानावःम्ह सरकारं गर्व साथ लोडसेडिङ म्हो यायेगु खःसा मतया भाः थकायेमाः धकाः धयाच्वंगु दु। छखे ज्या याइपिं जनतायात मत बी मफुसा भाः थकायेत दकलय् अप्वः विरोध याइगु दलया मन्त्री व प्रधानमन्त्री जुयाच्वंगु इलय् हे भाः थकायेगु सगर्व घोषणा यानाः थःपिनिगु असक्षमता तपुइ फइ मखु। झिदँ तक भाः थहां मवनीगु जूगुलिं भाः थकायेमाल धइगु तर्कया लिउने विद्युत प्राधिकरणया अनियमितता निसें मतया ध्यबा मपूपिं सरकारी निकाय व ततःधंगु निकाययात ज्वना ध्यबा म्हयेगु त्वःता अःपुगु लँपु भाः थकायेगु लँपु जक माओवादी नेतृत्वया सरकारं खनीगु छु खः व स्वयां ला झलनाथ खनालया इलय् मन्त्री जूम्ह गोकर्ण बिष्ट न्ह्यागु नं कथं सक्षम जूगु खनिं धइगु जक प्रमाणित याः छाय् कि उम्ह मन्त्री जूगु इलय् याःगु बांलाःगु ज्यायात माओवादी मन्त्री नं निरन्तरता बी मफुत ।

लोड सेडिङ विशेष यानाः सुख्खा मौसमया इलय् खुसिइ लः म्हो जुयाः यायेमाल धकाः धाइ तर अचम्म ला थ्व कि चच्छि न्ह्यः तक वालय् ४० घण्टा लोड सेडिङ याःसा गानाच्वंगु इलय् सुथय् जूबलय् वालय् ७० घण्टा थ्यने माःगु कारण छाय्? छु खुुसिइ चच्छिया दुने बच्छि लः पाः जुल ला? झीगु खुसित अज्याःगु खः ला? नेपाःया हाइड्रो पावर प्लान्टत फुक्क वा वइबलय् जक लः दइगु खुसिइ दयेकातःगु जकं खःकि? मखु धइगु खःसा सुख्खा मौसमय् खुसिइ लः पाः जुइफु तर छक्वलं छन्हुं हे पाः जुइगु मखु। तर लोड सेडिङ जक थुकथं अप्वयेके माःगुया तार्किक कारण थुकिं नं खने मदु। थुकथं स्वयेबलय् लोडसेडिङ यायेमाःगु कारण दुने मेगु हे कारण जकं सुलाच्वंगु जकं मखुला, उकिया नेतृत्व नं गनं माओवादी मन्त्रीं नं हे यायेमाःगु अवस्था छाय् पिदंगु जकं मखुला धकाः शंका याये छिंगु आधार उर्जामन्त्रीं लोडसेडिङ क्वपालेत नेपालं पुले मफइगु डिजेल प्लान्ट हयेगु तर्क बियाच्वंगु दु। छगू ला डिजेलया भाः थहां वनाः ताथ जुइत्यंगु आयल निगमया भरय् च्वनेमाःगु डिजेल प्लान्ट हयाः जनताया छ्यनय् कःनि सीगु शुरुवात माओवादी यायेगु स्वयां हाइड्रो पावर प्लान्टत याकनं याकनं दयेकेगु नितिं लँपु चायेकेगु नेतृत्व सरकारं यायेमाः। थुकथं स्वयेबलय् आःतक छम्ह हे माओवादी मन्त्रीतसें थःगु कार्य दक्षता क्यने फुगु मदु ।

More Stories Like this