सुनचाँदी व्यवसायी संघया येँ शाखाया झिदँ

येँ(सन्ध्या टाइम्स)/नेपाल सुनचाँदी व्यवसायी संघ येँ जिल्ला शाखा कार्यालय पलिस्था जूगु झिदँ क्यंगु लसताय् शाखाया क्षेत्रपाटीइ च्वंगु ज्याकुथी छगू तुच्चा ज्याझ्वः जुल। ज्याझ्वलय् संघया केन्द्रीय अध्यक्षं निसें शाखाया दुजःपिंसं शाखाया उत्तरोत्तर प्रगतिया कामना यासें भिंतुना देछानादीगु खः।
थुकिया लिसें थौंकन्हय् सुनचाँदी व्यवसायी संघ झन झन असुरक्षित जुयाच्वंगुलिं प्रहरी प्रशासनंनिसें समन्वयन यायेगु बारे सहलह जूगु खः। वंगु शुक्रवाः कपनय् जूगु घटनाया विरोधय् आइतवाः स्वनिगःया सम्पूर्ण लुँवहः पसः बन्द यासें सीडीओयात विरोधपत्र बीगु ज्याझ्वः नं पारित याःगु खः। ज्याझ्वलय् शाखाया अध्यक्ष महेन्द्ररत्न शाक्यं काठमाडौं शाखाया झिम्ह कर्मचारीतय्त वसः इनेगु ज्या नं जूगु खः।