न्यायालय-व्यवस्थापिका दथुइ मतभेद

येँ(सन्ध्या टाइम्स)/संसदया म्याद थपे याये दइ वा मदइ धइगु खँयात कयाः न्यायालय व व्यवस्थापिका दथुइ मतभेद ब्वलंगु दु। संविधानसभाया म्याद उकुन्हु खुला थपे यायेधुंकाः आः थपे याये दइ मखुत धकाः सर्वोच्च अदालतं याःगु फैसलायात पुनरावलोकन याकेगु लागिं संसद व सरकारं निवेदन तयेगु तयारी यानाच्वंगु इलय् लाक्क प्रधानन्यायाधीश खिलराज रेग्मीं थुकी पुनरावलोकन याये फइ मखु धकाः न्ववायेवं थ्व तनाव सुरु जूगु खः।
रेग्मीया थ्व धापू पिहां वयेवं राजनीतिक दलया नेतातय्सं वय्कःया विरोध सुरु याना हःगु दुसा राप्रपा नेपालया नायः कमल थापा छम्हेस्यां धाःसा समर्थन याःगु दु। संविधानसभाया अध्यक्ष सुभास नेम्बाङं तकं प्रधानन्यायाधीशया धापूयात अस्वाभाविक रुपं कयादीगु खँ सीदुगु दु। प्रधानन्यायाधीशया धापूयात कयाः दलतय् दथुइ थवंथः नं सहलह सुरु जूगु दु।
प्रधानमन्त्री डा. बाबुराम भट्टराईनं थौं तःधंगु स्वंगू दलया शीर्ष नेतातय् बैठक सःतादीगु दु। उगु बैठकय् थ्व विषययात कयाः नं चर्चा जुइगु खँ धाःगु दु।
संविधानसभाया म्याद खुलां अप्वः थपे याये दइ मखुत धकाः सर्वोच्च अदालतं याःगु फैसलाया पुनरावलोकन याकेगु लागिं संसद व सरकार निगुलिं निकायपाखें निवेदन बीगु तयारी जुयाच्वंगु दु।