जग्गा व्यवसायी पलायनपाखे

'कोहिनूर' या सुचं पिहां वयेवं मेपिं व्यवसायीतय्त दवाव

येँ (सन्ध्या टाइम्स)/नेपालय् हे दकलय् अप्वः शेयर न्याना तःम्ह धकाः चर्चित शेयर लगानीकर्ता निर्मल प्रधान थौंकन्हय् डिप्रेसनया वासः नयाः च्वनाच्वंगु दु। वय्कःयात डिप्रेसन जूगुया कारण खः, देय्या शेयर बजारय् वःगु मन्दी। शेयर बजाः मन्दी जूगुया कारण खः, देय्या बैंकतय् कारोवारय् वःगु शिथिलता। अले बैंकतय् कारोवार शिथिल जूगुया छता कारण खः, जग्गाया भावय् वःगु तःधंगु गिरावत ।

देशय् जग्गाया भाः कुहां वःगु कारणं यानाः जग्गाया कारोवार याइपिं गुलिखे मनूत देशं पलायन समेत जुइगु अवस्था वयाच्वंगु खँ विज्ञ सूत्रं धाःगु दु। नेपाःया रियलस्टेट व्यवसायया तःधंम्ह लगानीकर्ता कोहिनूर रियल स्टेटया नामय् छुं न्हि न्ह्यः तिनि बैंकं ३५ दिने म्याद तयाः ध्यबा पू वयेगु सुचं जारी यायेवं थ्व ख्यःया मेमेपिं लगानीकर्तात नं थारान्हूगु खँ सूत्रं धाःगु दु ।

सूत्रतय्सं धाः कथं जग्गाय् लगानी यानातःपिं आपालं लगानीकर्तातय् नां बैंकं पिकाःसां जीधुंकूगु अवस्थाय् थ्यने धुंकूगु दु। तर उमिसं थःपिनि जग्गा मियाः याकनं हे ध्यबा पुलेगु बचं बियातःगु कारणं जक नां पिमकासे थाति तयातःगु खः। तर उमिसं थःपिनि जग्गा मी धकाः कुतः यानाच्वंसां नं भाः मवःगु कारणं मी नं मफयाच्वंगु दु। उमिसं थःपिनि जग्गा पुलांगु हे भावं मीत स्वयाच्वंगु तर मी मफयाच्वंगुलिं बैंकतय्सं उमित आः कुहां वयाच्वंगु न्हूगु भावं जूसां जग्गा मीत दवाव बियाच्वंगु खँ नं सीदुगु दु ।

छखे दुगु जग्गा मी मफयाच्वंगु व मेखे बैंकतय्सं लगातार दवाव बियाच्वंगु कारणं गुलिखे जग्गाया लगानीकर्तात देशं हे पलायन जुइगु तकया मनस्थितिइ थ्यनाच्वंगु खँ नं सूत्रं धाःगु दु। छुं न्हि न्ह्यः तःधंगु रियल स्टेट कोहिनूरया नामय् बैंकं सुचं जारी यायेवं उकिया स्वाभाविक दवाव मेमेगु रियलस्टेट व्यवसायीतय्त नं लाः वंगु दु। थुकिं यानाः नां पिहां वये ल्यं दनिपिं व्यवसायीतय्सं याकनं जग्गा मिया छ्वइगु व उकिं यानाः बजारय् तःधंगु प्लटया जग्गाया भाः नं अझ कुहां वइगु आशा थन याना हःगु दु। जग्गा न्यानातःपिं व्यवसायीतय्सं स्थिति सुधार जुयाः भाः थहां वनी ला धकाः आशा यानाच्वंगु खःसां बैंकतय् दवावं यानाः उपिं ताःई पियाच्वने फइगु अवस्था मदया वंगु खँ नं सूत्रं धाःगु दु ।