औद्योगिक क्षेत्र लोडशेडिङ्ग मुक्त याये: प्रम
येँ(सन्ध्या टाइम्स)/ प्रधानमन्त्री डा. बाबुराम भट्टराईं औद्योगिक क्षेत्रयात लोडशेडिङ्ग मुक्त यायेगु घोषणा यानादीगु दु। वीरगंजय् जूगु अन्तर्राष्ट्रिय व्यापार मेला नेक्सपो�२०११या उलेज्या यासें औद्योगिक क्षेत्रयात लोडशेडिङ्ग मुक्त यायेगु घोषणा जक यानादीगु मखसे थुकियात गुगुं नं हालतय् पूवंकाः तुं त्वःतेगु दावी नं यानादीगु दु।
मेलाया आयोजनां देशय् आर्थिक क्रान्ति आवश्यक जूगु सन्देश बिउगु दु धासें वय्कलं आर्थिक ख्यःया विकासया निंतिं हइगु न्ह्यागु प्रस्ताव जूसां उकियात थम्हं ग्वाहालि यायेगु जुइ धकाः नं धयादीगु दु। वीरगंजय् अन्तर्राष्ट्रिय व्यापार प्रदर्शन केन्द्र निर्माणया निंतिं सरकारं सितिकं जग्गा चूलाका बीगु प्रतिवद्धता नं प्वंकादीगु दु।
उद्योग व्यवसाय प्रवर्द्धनया निंतिं माःगु जनशक्ति उत्पादनया निंतिं वीरगंजय् उच्चस्तरीय व्यवस्थापनया शैक्षिक प्रतिष्ठान दयेकेगु नं वय्कलं घोषणा यानादीगु दु।
