बैंकय् मुनाच्वंगु निक्षेप लगानी यायेत अर्थमन्त्रीया इनाप

येँ(सन्ध्या टाइम्स)/बैंक व वित्तीय संस्थाय् मुनाच्वंगु निक्षेपया सदुपयोग यानाः पुँजी निर्माण यायेत व उत्पादन मूलक ख्यलय् लगानी अप्वयेकेत अर्थमन्त्री वर्षमान पुनं इनाप यानादीगु दु। अर्थ मन्त्रालयं ग्वसाः ग्वःगु बैंकर्सत लिसेया सहलहया झ्वलय् मन्त्री पुनं उत्पादन ख्यःया केन्द्रीत यानाः बैंकतय्सं लगानी अप्वयेकेमाःगु खँय् नं बः बियादीगु खः।
सरकार व राष्ट्र बैकं लगानीया निंतिं माःगु पूर्वाधार तयार यायेगु प्रतिवद्धता प्वंकुसे मन्त्री पुनं बैंकिङ्ग ख्यलं उत्पादन व सेवामूलक खयःयात विशेष प्राथमिकता बीत नं इनाप यानादीगु खः। शान्ति व संविधान लिपा आर्थिक समृद्धि हे सरकारया मू एजेन्डा जूगु धासें वय्कलं थज्याःगु हे गतिं न्ह्याः वनाच्वन धाःसा झीसं काःगु लक्ष्य कथं आर्थिक वृद्धिं निगू अंकय थी मफइगु नं वय्कलं स्पष्ट यानादीगु दु। यदि आर्थिक वृद्धिदर निगू ल्याखय् यंकेगु खःसा लगानी नं निदुगं अप्वः जुइमाःगु वय्कःया धापू दु।
सरकारया नीति तथा कार्यक्रमं लक्ष्य पूमवना च्वंगु मदु धासें वइगु दिनय् थज्याःगु गल्ती मयायेगु जुइ धकाः नं मन्त्री पुनं धयादीगु दु। वय्कलं निजी ख्यः नापं सहकार्य यानाः न्ह्याः वनेत इनाप यासें छम्हं मेम्हसित ग्वाहालि यानाः न्ह्याः वंसा जक आर्थिक समृद्धिया लक्ष्य नं पूवंके फइगु स्पष्ट यानादिल।