न्हापां नेवाः, अले जक दलया कार्यकर्ता
देय् दबू सम्मेलन
येँ (सन्ध्या टाइम्स)/न्ह्यःने वयाच्वंगु नेवाः देय् दबूया तःमुँज्याया झ्वलय् लाकाः देय् दबूया राष्ट्रिय सम्मेलन म्हिगःनिसें सुरु जुल। निन्हुयंकं जुइगु उगु राष्ट्रिय सम्मेलनया उलेज्या म्हिगः सिद्धार्थ वनस्थली स्कूलय् देय् दबूया संरक्षकपिं लक्ष्मण राजवंशी, मल्ल के. सुन्दर व नायः नरेश ताम्राकारं मंकाः कथं सुकुन्दा च्याकाः उलेज्या यानादिल ।
ज्याझ्वलय् न्ववासें एनेकपा (माओवादी) या सभासद् हिसिला यमिं थौं गथे मधेसीत छप्पँ जुयाः वःगु खः नेवाःत नं अथे हे छप्पँ जुयाः न्ह्याः वयेमाःगु बिचाः प्वंकादिल।
नेपाली कांग्रेसया सभासद् ध्यानगोविन्द रंजितं थः दकलय् न्हापां कांग्रेस खः, वयां लिपा जक नेवाः खः धासें थौंया इलय् जातीय खँ ल्ह्वने मजिउगु बिचाः प्वंकादिल।
नेकपा (एमाले) या सभासद् डा. मंगलसिद्धि मानन्धरं मनूतय्सं दकलय् न्हापां थःगु पहिचान कायम यायेमाः, वयां लिपा तिनि वयागु मेमेगु खँ पूवनी धासें थः दकलय् न्हापां नेवाः खः, वयां लिपा एमालेया कार्यकर्ता खः धयादिल। देय् दबूया संरक्षक लक्ष्मण राजवंशीं विधान बल्लाःसा उकिं संस्थायात नं बल्लाका यंकी धासें नेवाः देय् दबूया विधान नं बल्लाके माःगु बिचाः प्वंकादिल ।
ज्याझ्वःया निगूगु ब्वय् देय् दबूया संरक्षक मल्ल के. सुन्दरं 'समसामयिक राजनीतिक अवस्था व नेवाः आन्दोलन' विषय विषयगत बिचाः न्ह्यब्वयादीगु खः। वय्कलं संघीय प्रणाली, स्वायत्त राज्य, नेवाः स्वायत्त प्रदेश आदि बारे ध्वाथुइकुसें थौंकन्हय् जातीय आधारय् तयार यानातःगु १४ प्रदेशया अवधारणायात विफल यायेगु लागिं थीथी थासं कुतः जुयाच्वंगु दु धयादिल ।
ज्याझ्वःया स्वंगूगु ब्वय् देय् दबूया विधान संशोधन बारे सहलह जूगु खः। थौं 'संघीयता व नेवाः राज्य' विषयय् विज्ञ राजेन्द्र श्रेष्ठं विषयगत प्रस्तुती यानादी ।
