मतया भाः थहां वनेवं लाइगु लिच्वः
जनतायात तःधंगु राहतया प्याकेज बीगु कार्यक्रम ज्वनाः सरकारय् वंम्ह प्रधानमन्त्री डा. बाबुराम भट्टराईनं नेपाली जनतायात वंगु झिदँ न्ह्यवंनिसें सुनां हे मबिउनि कथंया मार बीगु तयारी सुरु यानादीगु दु - मतया भाः थकयाः। थ्वहे वइगु माघंनिसें मतया भाः २० प्रतिशत तक थकायेगु स्वीकृति सरकारं नेपाल विद्युत प्राधिकरणयात बीधुंकूगु दु। थ्व ल्याखं आः प्राधिकरणं भाः थकायेगु निर्णय यायेधुंकूगु दु। वइगु माघंनिसें नेपाली जनताया छेँय् छेँय् २० प्रतिशत थप जुयाः मतया बील वइगु जूगु दु ।
मतया भाः थकायेमाःगु खँय् प्राधिकरणया थःगु हे तर्क दु, वंगु झिदँ न्ह्यवंनिसें मतया भाः थहां वंगु मदुनि, थुगुसी बल्ल थकायेत्यनागु खः। तर यथार्थ थ्व नं खः कि वंगु झिदँ न्ह्यवंनिसें प्राधिकरणं नेपाली जनतायात मतया सुविधा नं बियाच्वंगु मदुनि। लोड शेडिङं यानाः जनता अथें नं प्राधिकरण प्रति आक्रोशित दु, आः भाः थकायेगु ज्यां झन क्रोधित याना बी। मतया भाः थकायेगु ज्यां जनतायात मात्र मतय् जक मार लाकीगु मखु। थुकिं यानाः मत प्रयोग यानाः उत्पादन यायेमाःगु हरेक वस्तुया भाः थहां वनी ।
छखे मत मतयाः डिजेल पेट्रोल थेंज्याःगु उर्जा छ्यलेमाःगुलिं अथें नं बजाः भाः सी मदयेक थहां वनाच्वंगु दु। आः दुगु मत नं थिकयेक न्यायेमालीबलय् थहां वंगु बजाःभाःयात स्थायी हे याना बीगु निश्चित दु। मतया भाः थहां वनेसातकि जाकि, बजि, चिकं, छुचुं, चिनी आदि थेंज्याःगु न्हिंन्हिं माःगु ज्वलंया भाः समेत थकायेत प्रेरित याइ। अन्ततः प्यखेरं हे बजाःभाः थहां वनाः जनतां क्वबी हे मफइगु मार फये माली। थुकियात सरकारं नं पने फइ मखु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
