वेनया भ्रमण स्थगनं बिउगु सन्देश

डी.आर. खड्गी

झीगु देय् विश्व राजनीतिया खेल मैदान जुइगु संकेत खने दयावःगु दु। प्रत्यक्ष रुपं अमेरिका, भारत व चीनं नेपाःयात थःगु प्रभावय् लाकेत स्वयाच्वंगु दु। थ्व स्वंगू देय्या स्वार्थ अलग्ग अलग्ग खनेदु। अमेरिकाया स्वार्थ तिब्बतयात चीनपाखें छुटे यानाः राजनीतिक खेल म्हितेगु खः। भारतया स्वार्थ तिब्बतयात चीनपाखें स्वतन्त्र यायेगु लागि राजनीति यायेगु स्वयां नं नेपाःयात थःगु ईशाराय् प्याखं हुइका तयेगु खः। यदि भारतया इच्छा तिब्बत स्वतन्त्र यायेगु खःसा भारतया भूमिइ च्वनाच्वंपिं लाखौं तिब्बतीतय्त भारतया भूमि व भुटानया भूमिइ चीन विरोधी गतिविधि न्ह्याकेगु याना च्वनेफु। छाय्धाःसा भारतया अरुणाञ्चल प्रदेश तिब्बतया सीमा स्वानाच्वंगु दुसा भुटानया परराष्ट्र व रक्षा भारतया निर्देशनय् चले जुयाच्वनीगुलिं भुटानया भूमि नं चीन विरोधी गतिविधि न्ह्याकेफु। तर भारतं थःगु भूमिइ चीन विरोधी गतिविधि नियन्त्रण यानातःगु दु। अझ अरुणाञ्चल प्रदेशया सीमा ला बन्द हे यानातःगु दु। भारतं चाहे जूसा भुटान व अरुणाञ्चल प्रदेशया भूमिपाखें चीन विरोधी गतिविधि न्ह्याकेगु खेल म्हितेफु। थ्वहे कारणं यानाः झीसं अनुमान यायेफु कि भारतं खालि नेपाःयात थःगु ल्हातय् तयेगु लागि जक राजनीतिक खेल म्हिताच्वंगु खः। चीनया राजनीति धइगु नेपाः दुने जुइगु चीन विरोधी गतिविधि निस्तेज यायेगु लागि राजनीतिक खेल म्हितेगु खः धकाः अनुमान यायेफु। थ्व स्वंगू देश अमेरिका, भारत व चीनया राजनीतिक स्वार्थं नेपालय् छु लिच्वः लाइ धइगु चाहिँ भविष्यय् हे सी दइ।
नेपाःया राजनीतिइ खसब्रम्हू व मधेसीतय्गु अप्वः प्रभाव लानाच्वंगुलिं थ्व निगू जाति नेपाःया मुख्य राजनीतिक खेलाडी जुयाच्वंगु दु। थ्व निगू जातिया उद्देश्य देश व जनताया प्रगतिया लागि राजनीति यायेगु मखुसें खालि थःगु स्वार्थ पूर्तिया लागि जक राजनीति यानाः देश स्यंकेगु खः। थ्व निथ्वलं जातिया नेतात देश उन्नति व प्रगतिया लागि राजनीति यानाच्वंपिं खःसा उमिगु पार्टी दुने लुच्चा, फताहा व गुन्डातय्गु चलखेल मदइगु खइ। लुच्चा, फताहा व गुन्डातय्गु पकड पार्टीइ दुगुलिं जनतां पार्टी व्यवस्थायात हे घृणा यानाच्वंगु दु। पार्टीया नेतातय्सं देशयात स्यंकाः समाजय् अशान्ति, असुरक्षा जक यानां मगानाः विदेशी दलाल जुयाः विदेशी सेनायात तकं नेपालय् परेड म्हितके बियाच्वंगु दु ।

झीगु देशय् खुल्ला रुपं भारत व अमेरिका दथुइ कार्यगत एकता यानाः तिब्बतयात स्वतन्त्र यायेगुली जक मखु चीनयात हे निशाना दयेकेगु हिसाबं ज्या यानाच्वंगु दु। चीनं प्रत्याक्रमणया लागिं जक राजनीतिक चलखेल यानाच्वंगु खनेदु। छुं न्हि न्ह्यः दक्षिणी चीनया समुद्री इलाकाय् भारतया जलसेना दुगु थासय् चीनया सेना वनाः भारतीय सेना हटे जुइत बाध्य यात। थ्व घटनां प्रस्ट याः कि चीन व भारतया दथुइ न्ह्याक्व हे मित्रता दुसां दुनें दुनें धाःसा दुश्मनी भावना विकास जुयाच्वंगु दु। उकिं अमेरिकां नं चीनयात कमजोर यायेत नेपाः जक मखु चीनया जःखः लाःगु मेमेगु देशय् नं प्रभाव अप्वयेकाच्वंगु दु। बर्माय् सैनिक शासकं नागरिक समाजयात सत्ता लःल्हायेधुंकाः थौंकन्हय् पूर्व जनरल थिन सेनया गैरसैनिक सरकारं बर्मा संचालन यानाच्वंगु दु। थ्वहे मौकाय् भारत व अमेरिकां बर्माय् कुटनीतिक स्वापू अप्वयेकाः चीनया प्रभाव म्हो यायेगु कुतः यात। चीनया प्रभाव छुं भचा म्हो जुइवं हे मेकोङ उर्जा सम्मेलन यानाः उर्जा सम्बन्धी रणनीति बारे सहलह यायेत बर्मा लगायत चीन, भियतनाम, लाओस कम्बोडियायात सःतल। तर बिना कारण बर्मां मेकोङ उर्जा सम्मेलन स्थगित यात। बर्मां यानाः प्रधानमन्त्री वेन जियाबाओया भ्रमण नं दिके माला बिल ।

तर बर्मा सिबें नं नेपाःया अव्यवस्था, सुरक्षा व भारतपरस्त मधेसी नेतातय्गु कारणं हे चिनीयाँ प्रमया नेपाः भ्रमण स्थगित जूगु खः। जब बेन नेपाः वइगु हल्ला जुल भारत तसकं सशंकित जुल। भारत सशंकित जूगु छगू कारण भारतया प्रधानमन्त्री स्वयां न्ह्यः चीनया प्रधानमन्त्रीं नेपाः भ्रमण याइन धकाः खःसा मेगु कारण चीनं नेपाः विकासय् ग्वाहालि यात धाःसा भारतया प्रभाव म्हो जुइ धकाः नं खः। न्हापा पंचायत इलय् नं चीनं नेपाःयात लाकां, कापः, अप्पा व सिमेन्ट कारखाना दयेका बीवं भारतया कपाः स्यात। आः नं चीनं 'बिप्पा' सम्झौता यायेवं नेपालय् चिनीयाँ उद्योगत धमाधम वइ ला धकाः भारत सशंकित जूगु खः। चीन व नेपाःया सीमाय् अप्वः नाका खोले यानाः सडक व सुख्खा बन्दरगाह निर्माण यानाः अन्तर्राष्ट्रिय बन्यजन्तु चरण सम्झौता यायेगु ताः तयाः बेन जियाबाओं नेपाः भ्रमण यायेत्यंगु खः। यदि च्वय् न्ह्यथनागु योजनात सफल जुल धाःसा नेपाः विकासया लँपुइ न्ह्याः वनीगु जक मखु थःगु प्रभाव म्हो जुइ धकाः नं भारत थारान्हुल। वास्तवय् नेपाःया विकास जुल धकाः भारत थारा न्हुइ माःगु आवश्यकता नं मदु। छाय्धाःसा नेपाः न चीनया विरोधय् वनेगु आँट याइ न त भारतया विरोधय् वनेगु हिम्मत याइ। धाथें नेपाः विकास जुयाः शान्तिपूर्वक न्ह्यानाच्वन धाःसा भारत व चीन निगुलिं देशयात फाइदा जुइ। तर अःखः भारतं शंका यानाच्वंगु दु कि नेपालय् चीनया प्रभाव अप्वल धाःसा थःगु स्वार्थय् धक्का लाइ। भारतया ईशाराय् प्याखं हुलीपिं नेतात सक्रिय जुयाः बेन जियाबाओया नेपाः भ्रमण स्थगित यायेगु नाटक म्हितल। विशेष यानाः मधेसवादी नेतातय्सं बाबुरामया सरकार क्वःथलेगु ख्याच्वः नापं चीन विरोधी गतिविधि तच्वयेकेत द्वलंद्वः तिब्बती नेपालय् क्वकायेगु शुरु यात। थुलि जक मखु आत्मदाह याइपिं भिक्षुत तयार जुयाच्वंगु दु धकाः हल्ला तकं यानाच्वंगुलिं चीनं आन्तरिक कारण क्यनाः भ्रमण स्थगित यायेत बाध्य जुल ।

बेनया भ्रमण स्थगितं विश्वयात सन्देश वनाच्वंगु दु कि नेपाः अझ नं स्वतन्त्र राष्ट्र जुइ मफुनि। निक्वःगु सफल आन्दोलन लिपा वःपिं नेतात झन हे विदेशी दलाल जुयाः पिहां वःगु पुष्टि जुल। नेतात विदेशी दलाल जुयाच्वंत्तले देश जक बर्बाद जुइ मखु जनता नं फ्वगिं व नांगां जुइगु बाहेक मेगु छुं नं याये फइ मखु। गबले तक लोभी व विदेशी दलाल नेतातय्त माइनस यानाः देशभक्त, सक्षम नेतातय्त न्ह्यःने हये फइ मखु उबले तक देश बर्बाद जुयां तुं च्वनी ।

More Stories Like this