विरोध लिपा खनालया भाय् हिल

येँ(सन्ध्या टाइम्स)/एमालेया वरिष्ठ नेता केपी ओलीयात सभासद् दयेकेगु खँय् पार्टी दुनेया हे जनजाति नेतातय्सं विरोध प्वंकेवं अध्यक्ष झलनाथ खनालं थःगु भाय् हिला हःगु दु। वय्कलं ओलीयात सभासद् दयेकेगु खँय् पार्टीइ वःगु मदु धासें थ्व 'हल्ला' जक खः धयादीगु दु। म्हिगः विराटनगर झाःम्ह अध्यक्ष खनालं विमानस्थलय् पत्रकारतलिसे खँ ल्हासें ओलीयात सभासद् दयेकेगु धकाः वयाच्वंगु चर्चाया खण्डन यानादिल।
सूत्रतय्सं बिउगु जानकारी कथं पार्टीया आन्तरिक समस्या समाधान यायेगु लागिं भाजु खनालं हे ओलीयात सभासद् दयेकेगु प्रस्ताव तयादीगु खः। वय्कलं ओली लगायत उपाध्यक्ष वामदेव गौतम व नेता अमृत बोहरायात नं सभासद् दयेकेगु व थुकिया लागिं थौंकन्हय् सभासद् जुयाच्वंपिं शिला कतिला, पासाङ शेर्पा लगायतयात राजीनामा याकेगु तकया तयारी जुइधुंकूगु खः। तर पार्टीया जनजाति सभासद् व नेतातय्सं उकिया विरोध यासें यदि पार्टीं थ्व ज्या यात धाःसा तःधंगु 'दुर्घटना' जुइ धकाः ख्याच्वः बीवं थ्व तयारीयात 'स्थगित' याःगु खः। आः वयाः खनालं थःगु भाय् हिलाः ओलीयात सभासद् दयेकेगु खँ हे वःगु मदु, थ्व हल्ला जक खः धयादीगु दु। सूत्रया कथं जनजाति नेतातय्सं पार्टीया वरिष्ठ नेतातय्त हे नापलानाः ख्याच्वः बीवं नेतातय् बिस्कं बैठक समेत च्वंगु खः।