वैद्ययात सरकारय् यंकेगु प्रस्ताव
भट्टराईया सरकार क्वःथलेगु वैद्य पक्षया ख्याच्वः
येँ (सन्ध्या टाइम्स)/सत्तारुढ पार्टी एनेकपा (माओवादी)या अध्यक्ष पुष्पकमल दाहालं पार्टीयात विभाजन जुइगुपाखें बचे यायेत डा. बाबुराम भट्टराईया सरकारयात पुनर्गठन यानाः उकी असन्तुष्ट नेता मोहन वैद्य किरण पक्षया मनूत नं दुथ्याकेगु प्रस्ताव न्ह्यःने तयादीगु दु ।
तर सूत्रतय्सं धाःसा प्रचण्डं डा. भट्टराईया सरकार पुनर्गठन यायेगु धाःसां थ्व वास्तवय् वैद्य पक्षया नेतायात हे प्रधानमन्त्री दयेकेत न्ह्याकूगु 'प्रारम्भिक चाल' खः धाःगु दु। वैद्य पक्षं डा. भट्टराईया सरकार क्वःथलाः उकिया थासय् थःगु पक्षया नेता रामबहादुर थापा (बादल)यात प्रधानमन्त्री दयेकेमाः धकाः प्रस्ताव हे न्ह्यःने तयेधुंकूगु दु ।
वैद्य पक्षया उगु प्रस्तावयात थःगु समर्थन मदु धकाः प्रचण्डं पिने धायेगु याःसां दुनें दुनें धाःसा वहे प्रस्तावयात सफल यायेगु लागिं वय्कः लगे जुयादीगु दावी सूत्रं याःगु दु। उकिया हे लागिं वय्कलं आःयात डा. भट्टराईया सरकार पुनर्गठन यानाः वैद्य पक्षयात समावेश यायेगु धयादीसां अन्ततः थ्व विषययात वैद्य पक्षयात प्रधानमन्त्री हे दयेकेगु तक न्ह्याः वनेफुगु दावी सूत्रं याःगु दु ।
वैद्य पक्षं धाःसा थःपिं भट्टराईया सरकारय् समावेश जुइ मखु धकाः अस्वीकार यायेधुंकूगु दु। यदि भट्टराईनं राजीनामा मबिल धाःसा थ्व सरकारयात क्वःथलाः बरु कांग्रेस नेतृत्वया राष्ट्रिय सरकारयात थःपिंसं समर्थन याये फइ ख्याच्वः समेत वैद्य पक्षं बीधुंकूगु दु। थुकिं यानाः पार्टी विभाजन तक जुइफुगु सम्भावना खनाः प्रचण्डं वैद्य पक्षयात हे प्रधानमन्त्री दयेके माली धइगु रणनीति दयेकाच्वंगु सूत्रया दावी दु ।
संविधान च्वयेगु खःसा वैद्य
शान्ति प्रक्रिया सफल यायेगु लागिं डा. बाबुराम भट्टराईयात प्रधानमन्त्री दयेकू थें आः संविधान च्वज्यायात सफल यायेगु खःसा मोहन वैद्य पक्षयात प्रधानमन्त्री दयेके मालीगु अवस्था प्रचण्डं खंकादीगु खँ सूत्रं धाःगु दु। संविधान लेखनय् समेत वैद्य पक्षं पंगः थना हयाच्वंगु कारणं वैद्ययात हे प्रधानमन्त्री चले याके बिल धाःसा संविधान च्वज्याय् पंगः मवइगु विश्लेषण प्रचण्डं यानाच्वंगु दु ।
