संचारकःमि ज्ञानकुमारयात पितृ शोक

थुगु नेपालमण्डल डट कमया व्यवस्थापन सम्पादक ज्ञान कुमार महर्जनया अबुजु ज्ञान बहादुर महर्जन थौं सुथसिया झिता त्याः इलय् न्हय्खुदँया बैंशय् थःगु हे छेँय् मन्त । ताःइलंनिसें दमं कयाच्वंम्ह भाजु महर्जनया जहान नापं प्यम्ह काय् व छम्ह म्ह्याय् दु । वय्कःया थौं हे किपूया दीखुइ अन्त्येष्टि याइगु ज्याझ्वः दु ।

मदुम्ह महर्जनया तःधिकःम्ह काय् भाजु ज्ञानेश्वर महर्जन नेपालभाषाया नांजाःम्ह लय् चिनामि खः । अथेहे भाजु ज्ञानकुमार महर्जन नेवाः एफ. एम. १०६.६ मेगाहर्जया नापनापं नेवाः संचारकःमि दबूया दुजः खःसा नेपालभाषाया न्हिपौ सन्ध्या टाइम्सय् ज्या यानादी धुंकूगु खःसा थौंकन्हय् थी थी पतिइ आबद्ध जुयाः ज्या यानाच्वनादीगु दु । म्ह्याय् गंगा महर्जन किपू न्हय्गांलिसे स्वापू दगु पूधाः प्याखं लाखे क्वथैगुइ मू नकीं गुणवती जुयाः म्हितादीगु खः ।

More Stories Like this