पासा पुचः गुथि यूकेयात शंखधर सिरपाः लःल्हात

पासा पुचः गुथि यूकेयात थौं नेपालभाषा एकेदमिइ जूगु छगू ज्याझ्वःया दथुइ शंखधर सिरपाः लःल्हात ।

संखधर सिरपाः समितिया नायः पद्मरत्न तुलाधरया सभाध्यक्षताय् जूगु उगु ज्याझ्वलय् नेपालभाषा एकेदमिया चान्सलर संस्कृतविद् सत्यमोहन जोशीं पासा पुचः गुथि यूकेया नायः डा. सचेतन तुलाधरयात दसिपौ व झिंछद्वः व स्वीनितका लःल्हानादीगु खः । सिरपाः समितिया दुजः डा. पुष्पराज राजकर्णिकारं लसकुस यानादीगु उगु ज्याझ्वलय् नायः पद्मरत्न तुलाधरं नेपालभाषा एकेदमियात ग्वाहालि कथं चान्सलर सत्यमोहन जोशीयात झिद्वःतका लःल्हानादीगु खः । ज्याझ्वलय् सिरपाः कयादीम्ह डा. सचेतन तुलाधरं थःगु नुगः खँ प्वंकादीगु खः ।

अथेहे यूके च्वनादीपिं नेवाःतय्सं नेपालभाषा एकेदमियात ग्वाहालि कथं बिउगु छगू लख व पीद्वः तका एकेदमिया चान्सलर सत्यमोहन जोशीयात पासा पुचः गुथिया नायः डा. तुलाधरं चेक हस्तातरण यानादीगु खः । ज्याझ्वः लिपा न्हय्गां जात्राया लिसे स्वापू दुगु लाखे क्वथैगु पूधाः प्याखं नं क्यंगु खः ।

More Stories Like this