एमालेया स्वम्ह नेतायात संसदय् यंकेगु कुतः स्थगित
जनजाति सभासद्पाखें विरोध
येँ (सन्ध्या टाइम्स)/विपक्षी पार्टी एमाले दुने नेताय् दथुइ कायम जुयाच्वंगु कचवं ज्यंका छ्वयेत पार्टीया स्वम्ह वरिष्ठ दुजःपिं केपी ओली, वामदेव गौतम व अमृत बोहरायात संविधानसभाय् यंकेगु धकाः जूगु कुतः पार्टीया जनजाति सभासद् व मेपिं नेतातय्सं याःगु विरोधया कारणं 'स्थगित' जूवंगु दु ।
थ्व स्वम्ह नेतातय्त संविधानसभाय् यंकेगु लागिं संविधानसभाया स्वम्ह सभासद्तय्त राजीनामा बीकेगु धकाः कुतः जुयाच्वंगु दु। राजीनामा बीकीपिं स्वम्हं सभासद जनजाति जूगुलिं पार्टीया अन्य जनजाति नेतातय्सं विरोध याना हःगु खः। एमाले सूत्रं बिउगु जानकारी कथं संविधानसभाय् दुथ्याःपिं स्वम्ह जनजाति सभासद्तय्त लिकयाः उमिगु थासय् स्वम्ह ब्रम्हूतय्त छ्वये त्यन धासें पार्टीया जनजाति नेता व सभासद्तय्सं विरोध याना हःगु खः ।
थौंकन्हय् एमालेया स्वम्ह नेतातय्त संविधानसभाय् यंकेगु लागिं सभासद्त शीला कतिला, पासाङ शेर्पा आदिपिंत राजीनामा बीकेगु तयारी जुयाच्वंगु दु। थुकिया विरोधय् जनजाति नेता व सभासद्तय्सं विरोध याना हयेवं आःयात थ्व ज्या 'स्थगित' जूवंगु खः ।
थ्व स्वयां न्ह्यः पार्टीपाखें हे थ्व स्वम्ह सभासद्यात राजीनामा याकाः उकिया थासय् स्वम्ह नेतायात संविधानसभाय् छ्वयेगु धकाः नेतातय्सं तयारी याःगु खः। तर जनजाति सभासद्तय्सं विरोध याना हयेवं आः पार्टीं सुयां नं लागिं सुयातं राजीनामा या धकाः पार्टीगत रुपं निर्णय मयायेगु तर आः संविधानसभाय् वनेगु धकाः चर्चाय् वयाच्वंपिं नेतात थःपिंसं हे कुतः यानाः सुयातं सहमत यानाः राजीनामा बीकल धाःसा उकियात स्वीकार यायेगु धकाः सहमति दयेकूगु दु। सूत्रया कथं व्यक्तिगत रुपं सुयातं राजीनामा बीकेगु कुतः जुल धाःसा उकियात मेपिं सभासद्तय्सं विफल याना बीगु सम्भावना दु ।
एमाले अध्यक्ष झलनाथ खनालं लिपांगु इलय् वयाः पार्टी दुनेया कचवं ज्यंका छ्वयेगु लागिं संविधानसभाया चुनावय् बूपिं स्वम्ह वरिष्ठ नेतातय्त संविधानसभाय् यंकेगु धकाः प्रस्ताव न्ह्यःने हःगु खः ।
