केन्द्रीय कमिटीया विवादित विषय महाधिवेशनय् माओवादी बैठक
येँ (सन्ध्या टाइम्स)/ताः ई न्ह्यःनिसें लिछ्याना वयाच्वंगु माओवादी केन्द्रीय कमिटीया बैठकय् सहमति जुइ मफुगु विषयत आः महाधिवेशनय् यंकेगु तयारी पार्टी अध्यक्ष प्रचण्डं यानादीगु दु। पार्टीयात गुगुं हालतय् नं तज्याके मबीगु प्रतिबद्धता प्वंकुसें वय्कलं विवादित विषययात महाधिवेशनय् यंकाः समाधान खँ थः कार्यकर्तातय्त कनादीगु दु ।
थौं चितवनय् थःगु पक्षया कार्यकर्तातय्त नापलासें पार्टी दुनेया विवादयात कयाः खँ थुइकेगु झ्वलय् प्रचण्डं थ्व खँ धयादीगु खः। वय्कलं कन्हसंनिसें जुइगु पार्टीया केन्द्रीय कमिटीया बैठकय् पार्टीयात छप्पँ यायेगु प्रस्ताव यंकेगु नापं विवादित विषययात महाधिवेशनय् यंकेगु प्रस्ताव यायेगु खँ नं धयादीगु दु ।
वय्कलं केन्द्रीय कमिटीया बैठकय् शान्ति व संविधानयात पूवंकेगु कथंया हे प्रस्ताव यंकेगु जुइ धकाः स्पष्ट यानादीगु दु। अथे हे सेना समायोजन सम्मानजनक कथं पूवंकेगु जुइ धकाः न्ह्यथँसें पिनेया हल्लाया लिउलिउ मवनेत तकं कार्यकर्तातय्त निर्देशन बियादीगु खः। वर्तमान सरकारं शान्ति व संविधानयात पूवंकां हे त्वःतीगु दावी यानादिसें प्रचण्डं डा. बाबुराम भट्टराईया नेतृत्वय् दुगु वर्तमान सरकारया खुला तक विकल्प दइ मखु धकाः नं धयादिल ।
शान्ति व संविधान पूवंके धुंकाः नेपाली कांग्रेसं सरकारया नेतृत्व याइगु खँ नं वय्कलं कार्यकर्ताया न्ह्यःने खुलस्त यानादिल ।
तःन्हु न्ह्यःनिसें पार्टीया केन्द्रीय कमिटीइ गुज्वःगु प्रस्ताव यंकेगु धकाः तयारी यायेमाःगु जुयाः अध्यक्ष प्रचण्ड थः हे संयोजक जुयादीगु संवैधानिक समिति अन्तर्गतया विवाद समाधान उपसमितिया बैठकय् नं म्हिगः व थौं उपस्थित जुयादीगु मदु ।
उखे माओवादीया बरिष्ठ उपाध्यक्ष मोहन बैद्य पक्षधरं नं थःपिंसं केन्द्रीय कमिटीइ न्ह्यब्वयागु फरक मतयात कयाः कडा रुपं प्रस्तूत जुइगु नितिं आन्तरिक तयारी यानाच्वंगु दु ।
