रुपन्देही जिल्ला बन्द, सुनसरीइ सरकारी ज्याकू बन्द
येँ (सन्ध्या टाइम्स)/भुतुली थिल धकाः दायाः दलित सीगु घटनाया विरोधय् थौं संयुक्त संघर्ष समितिं रुपन्देही जिल्ला बन्द यात। उगु घटनाय् सीम्ह मनबीर सुनारयात सहिद घोषणा याये माःगु, सीम्हेसिया छेँजःपिंत क्षतिपूर्ति बीमाःगु व दोषीयात कडा कारवाही यायेमाःगु माग यानाः थीथी दल नाप लिक्क लाःगु जनवर्गीय संगठन, दलित मुक्ति मोर्चा, नेपाल दलित संघ, उत्पीडित जातीय मुक्ति समाज, समता समाज जानाः दयेकूगु संघर्ष समितिं थौं जिल्ला बन्दया आह्वान याःगु खः ।
बन्दं यानाः सिद्धार्थ राज मार्ग नापं पूर्व पश्चिम राजमार्गय् नापं सम्पूर्ण सवारी साधन ठप्प जूगु दु। बन्द आह्वान याना तःगुलिं उगु लागाया सम्पूर्ण कलकारखाना, बजाः नापं शिक्षण संस्था तकं बन्द जुयाः जनजीवन प्रभावित जूगु दु ।
मेखे कर्मचारी संघ/सगठनपाखें थौं सुनसरीया फुक्क सरकारी ज्याकू बन्द याःगु दु। छम्ह कर्मचारीयात ज्वंगु विरोधय् थ्व बन्द याःगु खः। भारतया आसाम व नागाल्याण्ड लागाय् पृथकतावादी आन्दोलन याना वयाच्वंम्ह निरन्जन होजाईयात नेपाःया नागरिकता बीत सिफारिस याःगु द्वपनय् नानुलाल उराउयात प्रहरीं ज्वंगु खः। होजाईं धरान�८ ठेगाना तयाः सुनसरी जिल्ला प्रशासनपाखें नागरिकता काःगु खः ।
थ्व प्रकरणय् ज्वंम्ह कर्मचारीयात त्वःतेमाःगु माग यासें कर्मचारी संगठनतपाखें थ्व बन्द आह्वान याःगु खः। क्षेत्रीय माटो परीक्षण प्रयोगशाला झुम्काया प्रमुख नानुलालं सरकारी अधिकृतया हैसियतं निरन्जन होजाईयात नागरिकताया निंतिं सिफारिस याःगु खः। थौंकन्हय् वडा व नगरपालिकापाखें नागरिकताया नितिं सिफारिस यायेमाःगु जूसां उरावं तप्यंक हे सिफारिस यानादीगुलिं अनुसन्धान यायेत नियन्त्रणय् कयागु खँ प्रहरीं धाःगु दु ।
