हाकनं राष्ट्रपति हे सक्रिय जुइगु लँपु

मधेसी समुदाययात मंकाः कथं नेपाली सेनाय् प्रवेश याकेगु सरकारया निर्णययात पनेगु लागिं हानं छक्वः राष्ट्रपति हे न्ह्यचिलीगु सम्भावना खने दया वःगु दु। सरकारं याःगु थ्व निर्णय पाय्छि मजू धकाः विपक्षी राजनीतिक दलतय्सं विरोध यानाच्वंगु ला जु हे जुल, उकिया नापनापं नेपाली सेनां समेत विरोध यासें थ्व मुद्दायात राष्ट्रपतियाथाय् तकं यंकूगु दु। राष्ट्रपति नेपाली सेनाया परमाधिपति समेत जूगु कारणं प्रधानसेनापति छत्रमानसिं गुरुङं म्हिगः वय्कःयात नापलानाः सरकारया थ्व निर्णय पनेगु लागिं 'हस्तक्षेपकारी भूमिका' म्हितेत आग्रह यानादीगु दु। थ्व अवस्थाय् सेनाया मामिला जूगुलिं सरकारं याःगु निर्णययात राष्ट्रपतिं हस्तक्षेप यानाः पना बीफुगु सम्भावना नं उतिकं दु। थ्व स्वयां न्ह्यः तत्कालिन प्रधानसेनापति चीकेगु धकाः प्रचण्डया सरकारं याःगु निर्णययात राष्ट्रपतिं पना बिउगु ला सकस्यां सिउगु हे खँ जुल। उकिं आःया सरकारं याःगु सेना सम्बन्धी निर्णययात नं राष्ट्रपतिं पने फइगु सम्भावना दु। यदि अथे जुल धाःसा राष्ट्रपति हानं छक्वः कार्यकारी तहलय् कुहां वइगु व सरकारलिसे कचवं जुइगु प्रवल खतरा दु। अय् जूगुलिं थ्व निर्णययात कार्यान्वयन याये न्ह्यः हानं छक्वः बिचाः याःसा बांलाइ। अथें हे नं थ्व निर्णय यानाः सरकारयात छुं लबः दइगु अवस्था मदु। देय्या फुक्कं पार्टी व फुक्कं जातिं विरोध याना हःगु कारणं थ्व ज्यां डा. बाबुराम भट्टराईया छबीयात हे बांमलाक ध्वस्त याना बीगु खतरा दु। आः राष्ट्रपतिपाखें समेत पनीगु सम्भावना दुगुलिं उकियात हे त्वह दयेकाः वय्कलं थ्व निर्णय खारेज याना बिउसा तःधंगु बुद्धिमानी जुइ ।

More Stories Like this