मुलुच्वका
पुष्प तुलाधर
कविता तहाया वनी,
मुलुच्वकाया मिखां सालाः
सी मदुगु हलिं यलाः
न्ह्यब्वया बी
यचुक
लख पिक्सेलया किपाय् ?
बँय् वांछ्वा तःगु
मसीनिगु चुरोथया थुत्ता
ग्वालिं न्हुयाः छत्याःचा कुँ
सर्मतय् ब्वया वनी
सालुक
न्हाबूगु सुपाँय् ?
अजू ? क्यबया स्वां त्वताः हां
भुतुली देछूगु कफि नँतुनाः
खायुलिं नस्वा जक त्वनाः
कस्ति हाप्वः ज्याइ
यैपुक
पुन्हिया मिलाय् ?
व हाप्वः तिसिनाः कस्तिं
कफी सवाः थकाइ, पोलेन
ह्याउँबःसि वांन्यानाः म्हुतुइ
ईया खुसि न्ह्याइ
चाकुक
मिस्रीया काराय् ?
येतालीगु निभालं कयाः
मिया तःगु छहासा बःसी
ध्वगीगु बःसि ल्यत्तु ल्ययाः
ईताथिता ह्वला थकी
भुइभाय्दंक
पसः ग्वयेन्ह्यः पसल्यां ?
ध्वग्गीगु बःसिं लुयावःगु तिं
बँय् थाःगु च्यातः च्यातः
देय्या बिस्कंगु छप्पा बँकिपा
थस्सः पाना बी
थस्स नँ वयेक
तिना वंगु बजाः ?
कन्हेकुन्हु, सुथं छबथां बखुं ब्वनी
ल्यंपुल्यं त्वाथं क्वानाः नकी
बखुंतय्गु पपुतिं फय्या झत्कां
बँ पुना यनी
सुचुक्क
बजाः यचुपिचसकाः ?
पलखं न्हि स्वाना यनी सुकातिं
भू सीमदयेक हलिं
म्वः म्वः पसः वःपिनि इरुथिरु
बजारं सासः फी
लुदंक
पसल्ययात मुसुकाः ?
Related Stories
दुहिसि नुगःचु लिपस्टिकMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
