गृहस्थीया मिखाय् प्रव्रजितपिं

लोचनतारा तुलाधर
थुथाय् झीसं चायेकेमाः कि उगु ईया उपिं युवा भन्ते, गुरुमांपिं थौंकन्हय्यापिं झी कायम्ह्याय्पिं थें विदेशी सुविधा भोगी जुयाः उगु हे देशय् पलायन जुया बिउगु जूसा झी थौं बुद्ध शिक्षां द्याकाच्वने मालीगु जुइ।
छन्हु जेष्ठ महिनाया अतिकं तांन्वः कुन्हु तन्न निभाः थिनाच्वंगु इलय् सँ मदुगु पाचुगु छ्यनय् निभालं खयेकाः भन्तेपिं लँय् बिज्यानाच्वंगु खना। ल्याय्म्हचापिं भन्तेपिनि पलाः च्वः। उकी मध्ये थकालिम्ह ज्याथम्ह भन्ते तुतां बः काकां बुलुहुँ बिज्यानाच्वन। जिं घडी स्वया, झिताःत्या ई नं पुलेधुंकल। भोजन यायेत गन तक थ्यंके मानिगु थें जिके न्ह्यसः दन। इलय् मथ्यन कि मजिउ। १२ बजे लिपा भोजन याये मजिउ। मनय् खँ वल - छछाः भोजन यायेत याउँक छेँय् नयेगु त्वःताः उखेथुखे छेँया स्वाहाने गः वनेमाः, गुलि थाकु ! भन्तेपिं जिगु मिखां चिले धुंकल। जिगु मनं दृश्य लिसा काल, थज्याःगु निभालय् ... छछाः नयेत ! भोजन साइ, मसाइ, चि मगाइ, चि न्वइ, न्यालुइ, पालुइ व खँ दाताया छेँकथं वनी। उकी प्रव्रजितपिंसं छुं धाइ मखु। प्वाः थनेत सकतां कथंया भोजन भपाः बिज्याइ छाय्कि बहनीया ब्यलि वसपोलपिंसं याइ मखु। हाकनं झी गृहस्थपिनि थें थीथी प्रकारया 'डिंर्स' दुगु भ्वय्, पार्टी नं वसपोलपिंसं त्याग याये धुंकल। साःसाःगु परिकार नं लय् ग्वःकः चूलाइ, मसिउ।
अथे हे छन्हु पौष महिनाया तसकं चिकुगु सुथय् न्हिंन्हिं थें जि मर्निक वाक् वनाच्वनागु सुथसिया ६ बजे द्यः खिउँखिउँ धाः। ल्यासेचापिं अनगारिकापिं छ्यनय् गुलाफीगु ऊनया तपुलिं पुयाः पलाः च्वयेका बिज्यानाच्वंगु खना। पुन्हि जूगुलिं थःगु विहारं मेगु विहारय् बुद्ध पुजाय् लाकेत बिज्याःगु खनिं। चिकु तांन्वःया सवाल मदु। वसपोलपिं थःगु रुटिङ कथं न्ह्याः वनाच्वने हे माः। यचुसे पिचुसे वैंशं जायाच्वंगु ख्वाः, सँ मदुसां बांलाः। वसपोलपिंत आधुनिक श्रृंगार व फेसनं थिउ वःगु मदु, अय्नं बांलाः। त्याग चित्तया प्रतिबिम्ब ख्वालं गनं गनं ज्वया च्वं। थौंकन्हय्या ल्यासेचापिं गृहस्थीपिं लुमंके - तुतिं निसें ख्वाः थ्यंक आधुनिक श्रृंगार याये थाय् दु। सँ जक हे गजाःगजाःगु फेशन ! तुयुगुयात हाकुकेगु वा हाकुगुयात ह्याउँकेगु। ख्वालय् छु जक याये? वसः गज्याःगु पुने? लाकां गज्याःगु न्ह्याये? थ्व फुक्कया चिउताः त्याग यानाः व ल्यासेचापिं अनागारिकापिं छताजिया हे जक वसः पुनाः, सँ पाचुक चानाः थःत छिं कथंया हे जक लाकां न्ह्यानाः बुद्ध शरणय् प्रव्रजित जुयाच्वन। बाझः वंपिं गुरुमांपिं स्व, कलाः, मां, अजि, धायेकेगु तृष्णा त्वःताः गुलि शान्तपूर्वक च्वंच्वन, बुद्ध शिक्षा ग्रहण यानाः।
थौंकन्हय् आधुनिक संसार कथं न्ह्याः वनेत प्रव्रजितपिंसं नं औपचारिक शिक्षा, कम्प्यूटर शिक्षा नं बुद्ध शिक्षा नापनापं हे सयेकाच्वने माःगु जुल। उकिं यानाः वसपोलपिनि झन हे लिमलाः। हाकनं सुं मनू उसाँय् मंत वा मनू हे मंत धाःसां नं थःगु व्यक्तिगत ज्या त्वःताः जूसां परित्राण व ओवाद उपदेश बीत बिज्यायेमाः। हाकनं थःपिं उसाँय् मदुगु बखतय् धकाः वासः यायेत झीथाय् देशय् छुं व्यवस्था दुगु मखुनि। अथेसां वसपोलपिंसं (भन्ते व गुरुमां निखलकं) बुद्ध शासन स्थिर यायेत बुद्ध शिक्षा अध्ययन यानाः थम्हं सिउगु खँ कनाः शिक्षाया प्रचार याना बिज्यानाच्वन। परियत्ति, प्रतिपति व प्रतिवेधया लँपु जुजुं समाजय् शिक्षाया जः ह्वलाच्वन। यदि वसपोल प्रव्रजितपिं झी न्ह्यःने मदुगु जूसा झी बुद्ध बूगु देय्या नागरिकत बुद्ध शिक्षां हे बञ्चित जुइ मालीगु खइ।
ल्वःमंके मजिउगु खँ छता थ्व नं दु कि थेरवाद बुद्ध धर्मया प्रारम्भिक इलय् आपालं भन्ते व गुरुमांपिंसं भारत, श्रीलंका, बर्मा आदि देशय् बुद्ध धर्मया उच्च शिक्षा कयाः थःगु मां देय्, बुद्धभूमिइ प्रचार यायेत लिहांबिज्यात। थुथाय् झीसं चायेकेमाः कि उगु ईया उपिं युवा भन्ते, गुरुमांपिं थौंकन्हय्यापिं झी कायम्ह्याय्पिं थें विदेशी सुविधा भोगी जुयाः उगु हे देशय् पलायन जुया बिउगु जूसा झी थौं बुद्ध शिक्षां द्याकाच्वने मालीगु जुइ। व इलय् नेपालय् नयेगु व च्वनेगुया ठेगान हे मदुगु कष्टकर इलय् हे नं वसपोलपिंसं थन धर्म प्रचारया अभियान न्ह्याकाबिज्यात। धन्य खः उपिं त्यागीपिं। प्रव्रजितपिं। बन्दना !

More Stories Like this