रहस्यमयी जुयाः म्वानावंम्ह नेता किम जोङ इल

उत्तर कोरियाया राष्ट्रपति किम जोङ इल सोमवाः मंत। विश्वया मेमेगु देय्पाखें बिस्कं च्वनाच्वंगु थेंज्याःगु देय् उत्तर कोरियाय् थ्यंमथ्यं निगू दशक राज याःम्ह इल थः हे नं छम्ह रहस्यमयी व्यक्तित्व जुयाः म्वाना वन। सन् १९९४ य् वया अबु किम इल सुंग मदयेवं सत्ता क्वबिउम्ह इल न्ह्याबलें हे विश्वया निंतिं छम्ह रहस्यमयी व्यक्तित्व जुयाबिल। राष्ट्रपति जुइ स्वयां न्ह्यः नं व म्हो हे जक सार्वजनिक ज्याझ्वलय् खने दयेकः वन ।

वंशया आधारय् उत्तर कोरियाय् शासन याःम्ह इल अन्तर्राष्ट्रिय ख्यलय् न्ह्याब्लें ग्यानापुम्ह नेता कथं दनाच्वन। थःगु देशय् मिसाइल परीक्षण यानाः, परमाणु हतियार दयेकेगु ज्याझ्वः न्ह्याकाः इलं अमेरिका, दक्षिण कोरिया थेंज्याःगु देय्यात न्ह्याबलें ख्याना हे च्वन।
सन् १९८७ य् उत्तर कोरियाया सेनां दक्षिण कोरियाया छगः विमानयात कुर्काबिल। अबुं शासन यानाच्वंगु इलय् कायम्ह इलया व्यक्तिगत आदेशय् थ्व विमान कुर्कूगु धापू दु ।

दक्षिण कोरियाया मिडियां इलयात न्ह्याबलें छम्ह घमण्डी, बुरफो हेयरस्टाइल तया जुइम्ह छम्ह प्लेब्वाइया रुपय् ब्याख्या यात। दक्षिण कोरियाली मिडियाया कथं बागःचाम्ह इल तःधिकः खने दयेकेगु निंतिं न्ह्याब्लें प्लेटफर्म लाकां न्ह्याना जुइम्ह खः ।

दक्षिण कोरियाली मिडियां ला वयात छम्ह बेवकूफ कथं हे नालातःगु दु। इल नये-त्वनेगुली नं तसकं सौखिनम्ह खः। इल रुस भ्रमणय् वंबलय् वया लिसें जूम्ह रुसी राजदूत कोन्स्टेन्टिन पुलिकोभस्कीया कथं वं न्ह्याब्लें विमानपाखें उत्तर कोरियाय् म्वाःम्ह बिच्छि कायेके छ्वइ, अले वयात वहया चपस्टिकपाखें म्वाःम्वाकं हे नइ। पुलिकोभस्कीं थः इललिसे जुयाबलय् बांलाःपिं मिस्तलिसे च्वनाः तःक्वः हे श्याम्पेन त्वनागु खँ कंगु दु। सन् २००० य् दक्षिण कोरियालिसे शिखर वार्ता जूबलय् उत्तर कोरियाली राष्ट्रपति इलं झिगू गिलास अय्लाः त्वंगु टेलिभिजनय् हे खनेदुगु खः ।

अन्तर्राष्ट्रिय ख्यलं वया बारे न्ह्यागु धाःसां थःगु देय् उत्तर कोरियाय् धाःसा राष्ट्रपति इल छम्ह हिरो कथं म्वानावन। उत्तर कोरियाया आधिकारिक धापू कथं राष्ट्रपति इलया जन्म छगू सिँया क्याबिनय् जूगु खः, अले व बूगु इलय् सर्गतय् छगः थीगु नगु व निगू लाय्लामा खनेदुगु खः। अथे हे इलं निदँ जक दुबलय् हे खुगू ओपेरा च्वल, अथेहे राजधानी प्योङयोङय् च्वंगु छगू नांजाःगु थाय्या डिजाइन नं याःगु खः ।

तर पिनेयापिनि धापू कथं इलया जन्म रुसी शहर खबारोवस्क लिक्क जूगु खः, गुबलय् वया अबु सोभियत सेनाया समर्थन कायेत रुस वयाच्वंगु खः।
निगू कोरिया दथुइ ल्वापु जूगु इलय् ल्याय्म्हम्ह इल चीनय् च्वनाच्वंगु खः। अले उत्तर कोरियाया अप्वः थें ल्याय्म्हतय्सं ब्वंगु कलेजय् हे इलं नं स्नातक पूवंकल। सन् १९७५ य् वयात 'प्रिय नेता'या उपाधी लःल्हात, वयां न्यादँ लिपा कोरियन वर्कर्स पार्टीया केन्द्रीय समितिइ थ्यन। अन वयात संस्कृति व कला सम्बन्धी जिम्मा बिल ।

फिल्म क्रेजी
इल फिल्मया क्रेजी हे धाःसां जिउ। वयागु लाइब्रेरीइ जक नीद्वलं मल्याक हलिउड फिल्म तयातःगु दु। वयात यःम्ह हिरोनी एलिजावेथ टेलर जुयाच्वन। इलं फिल्मया बारे छगू सफू नं च्वःगु जुयाच्वन। फिल्मय् व थुलि क्रेजी कि वं सन् १९७८ य् दक्षिण कोरियाया फिल्म निर्देशक शिन सांग ओके व वया कलाः चोई युन हीयात अपहरण याकल, अले उपिं निम्हतिपूयात न्यादँ तक अलग अलग कुनाबिल। न्यादँ लिपा छगू समारोहय् उपिं निम्हतिपू नापलाके बिल, अले उमिके माफी फ्वनाः थःगु निंतिं फिल्म दयेकेत इनाप यात। निर्देशक ओके थः कलाःलिसे जानाः न्हय्गू फिल्म दयेकल। सन् १९८६ य् ह्वःताः चूलायेवं निम्हं पश्चिमपाखे बिसिउँ वन ।

राजनीतिक जीवन
सन् १९९१ य् इलयात कोरियन पिपुल्स आर्मीया सर्वोच्च नेता कथं ल्यल। राष्ट्रपति किम इल सुङया उत्तराधिकारीया खँय् लिपा ल्वापु मजुइमा धयागु ल्याखं वयात सर्वोच्च नेता ल्यःगु खः। सन् १९९४ य् किम इल सुङया मृत्यु लिपा जोङ इल राष्ट्रपति जुल। व राष्ट्रपति जूगु इलय् उत्तर कोरिया न्यंकभनं आर्थिक संकट तच्वयेधुंकल। अनया व्यापार पूवंक हे खतम जुइधुंकल, प्राकृतिक विपत्तिया कारणं बाली फुक्क नष्ट जुल, लखंलख मनू सित ।

इलं विशेषत चीन व अन्तर्राष्ट्रिय ख्यःया ग्वाहालिं देसय् वःगु संकटयात छुं भचा म्हो यात। वं तःक्वः हे चीनया भ्रमण यात, अले दक्षिण कोरियालिसे स्वापू बांलाकेगु निंतिं छुं भचा ज्या नं यात। सन् २००० य् दक्षिण कोरियाली राष्ट्रपति किम दाए जुंगलिसे शिखर वार्ता यात। सन् १९५३ य् कोरियाली युद्ध लिपा निगू देय् दथुइ थ्व न्हापांखुसी शिखर सम्मेलन जूगु खः ।

राष्ट्रपति इलयात कयाः इलय् ब्यलय् थीथी खँ नं पिहां वल। सन् २००८ या अगस्टय् छगू जापानी पत्रिकां किम जोङ इल सन् २००३ य् सीधुंकूगु व आः सार्वजनिक रुपं खने दयाच्वंम्ह व थेंच्वंम्ह मेम्ह मनू खः धाल।थ्वयां लछि लिपा देय्या ६० औं वार्षिकोत्सवया सैनिक परेडय् राष्ट्रपति इल मवन, अले अमेरिकी गुप्तचर संस्थां इलयात ह्दयाघात जूगु धाल। थज्याःगु हल्लाया दथुइ उत्तर कोरियाली अधिकारीतय्सं सन् २००९ य् इलया छगू भिडियो फुटेज सार्वजनिक यानाः इल म्वानाच्वंगु व सक्रिय राजनीतिइ दुगु दावी यात ।

थ्वया हे दथुइ सन् २००९ स अमेरिकी राष्ट्रपति बिल क्लिन्टन उत्तर कोरियाय् बन्धक दयेकातःपिं निम्ह अमेरिकी पत्रकारतय्त त्वःतकेत उत्तर कोरियाय् वन। उबलय् राष्ट्रपति इलं हे क्लिन्टनयात नाप लात। थ्वयां लिपा अमेरिकी पत्रकारत नं मुक्त जुल ।

More Stories Like this