माओवादीया कारणं मेगु होटल बन्द

माओवादी मजदुरतय् ज्यादतिया कारणं देय्या मेगु छगू औद्योगिक प्रतिष्ठान होटल वैशाली बन्द जूगु दु। थःपिनि तलब अप्वयेके माःगु माग यासें हडताल यानाच्वंपिं माओवादी समर्थित मजदुर युनियनं अन्ततः ज्या बन्द यानाः होटल सञ्चालन हे याये मफइगु अवस्था पिकया बीवं व्यवस्थापनं सदांया लागिं हे होटल बन्द यायेगु निर्णय याःगु खः। थुकिं यानाः अन ज्या यानाच्वंपिं सछिम्ह नेपाःमि मजदुरत बेरोजगार जुइगु अवस्था पिहां वःगु दु।
माओवादी मजदुरतय्गु थज्याःगु हे ज्यादतिं यानाः विराटनगरय् च्वंगु सूर्य नेपालया वसः कारखाना नं बन्द जूगु खःसा उकिं यानाः सलंसः मजदुरत बेरोजगार जूवंगु खः। छुं न्हि न्ह्यः तिनि उमिसं नगरकोटया क्लब हिमालय समेत बन्द याना बिउगु खः। अझ जनयुद्ध न्ह्यानाच्वंगु इलय् उमिगु कारणं आंशिक रुपं व सदांया लागिं हे बन्द जूवंगु औद्योगिक प्रतिष्ठानया धलः स्वल धाःसा ताःहाकः जुइफु। छखे माओवादीं हे नेतृत्व यानाच्वंगु सरकारया प्रधानमन्त्रीं भारतय् वनाः वैदेशिक लगानी दुकायेमाः धकाः सकस्यां विरोधया वावजूद नं 'बिप्पा' थेंज्याःगु सम्झौता याना वयेगु, अले मेखे थःगु देशय् चाहिं वहे पार्टीया कार्यकर्तातय्सं विदेशी व स्वदेशी लगानीइ सञ्चालन जुयाच्वंगु उद्योग कारखानात धमाधम बन्द याना बीगु। माओवादीया नीति, ज्या व बिचाः थुइके थाकु। थुकिं यानाः उपिं प्रति विश्वं यानाच्वंगु अविश्वासयात अझ गाढा जक याना बी। खुल्ला राजनीतिइ वयेधुंकाः हानं पुलांगु हे पहः क्यनाः व्यवहार याना जुइगु माओवादीया व्यहोराय् तःधंगु हे सुधार वयेमाःगु आवश्यकता दु ।

More Stories Like this