धर्मोदय सभाया साधारणसभा क्वचाल

किपू(सन्ध्या टाइम्स)/धर्मोदय सभाया ख्वीच्याक्वःगु वार्षिक साधारण सभाया उलेज्या संघनायक भिक्षु अश्वघोष महास्थवीरं नगरमण्डप श्रीकीर्ति विहारय् यानाबिज्यात। धर्मोदय सभाया नायः बद्रिरत्न बज्राचार्यया सभापतित्वय् न्ह्याःगु उगु ज्याझ्वलय् मूपाहां भिक्षु अश्वघोषं शीलप्रार्थना एवं बज्राचार्य गुरुजु व महायानी गुरुपिंसं स्वस्ति वाचन यानाबिज्याःगु खः। ज्याझ्वलय् बुद्ध धर्म ख्यलय् विशेष योगदान दुपिं च्याम्ह व्यक्तित्वपिं लक्ष्मीदास मानन्धर, पद्म ज्योति कंसाकार, पंचवीरसिंह तुलाधर, डा. त्रिरत्नमान तुलाधर, दबलकाजी तुलाधर, डा. बज्रराज शाक्य, प्रेमसुन्दर तुलाधर, द्रव्यमान सिंह तुलाधरपिंत वय्कःपिनि योगदानया कदर कथं हनापौ नं लःल्हाःगु खः।
ज्याझ्वलय् महासचिव सुचित्रमान शाक्यं वार्षिक प्रतिवेदन, दांभरि रत्नमान शाक्यं आर्थिक प्रतिवेदन न्ह्यब्वयादीगु खःसा सर्वज्त्न तुलाधरं निर्वाचन आचार संहिता बारे ध्वाथुइकादीगु खः। अथे हे डब्लुएफबीया न्वकु मा. पद्मज्योति कंसाकार, समितिया न्वकु लक्ष्मीदास मानन्धर, लुम्बिनी विश्वविद्यालयया उपकूलपति डा. त्रिरत्न मानन्धरपिंसं धर्मोदय सभां यानाच्वंगु व यायेमाःगु ज्याखँया बारे नुगःखँ कनादीगु खः।
ज्याझ्वलय् मध्यपुर थिमिपाखें कृष्णकुमार प्रजापति, ख्वपं महेन्द्र शाक्य, लमजुङं बिजय बहादुर गुरुङ्ग, कास्कीं प्रकाश उदास, पाल्पां त्रिरत्नलाल शाक्य व सुर्खेतं काँकरे विहारया प्रतिनिधिपिंसं थःथःगु प्रतिवेदन न्ह्यब्वयादीगु खः। उपस्थित जुयादीपिं मध्ये आपाःसिनं प्रतिवेदन व संस्थाया विषयय् नं टिप्पणी जूगु खः।
महासचिव सुचित्रमान शाक्यं लसकुस यानादीगु उगु ज्याझ्वलय् महिला बौद्ध समूहया नायः बासन्तीदेवी बज्राचार्य व युवक अध्ययन मण्डलया नायः सुरेन्द्र शाक्यं भिंतुना बियादिल। लिसें न्वकु सुवर्ण शाक्य व लिउ दांभरि सागरमान बज्राचार्यं सुभाय् बियादीगु खः।
निगूगु चरणया ज्याझ्वः न्वकु लक्ष्मीदास मानन्धरया सभापतित्वय् न्ह्याःगु खः। वंगु आइतबाः जूगु चुनावय् उपाध्यक्ष पदय् दक्ष्मीदास मानन्धर, इन्द्रबहादुर गुरु, पद्मज्योति कंसाकार, सुचित्रमान शाक्य व नानीमैंया मानन्धर निर्वाचित जुयादीगु खः।