नेवाः एकता दिवस हनेत गं थायेगुनिसें सिठी जुलुस तकया ज्याझ्वः
येँ(सन्ध्या टाइम्स)/वइगु पुस १८ गते तिंख्यःया खुल्लामञ्चय् तःजिक नेवाः एकता दिवस हनेगु नितिं थाय्थासय् भेला, र्याली नापं सिठी जुलुस पिकाये तयारी सुरु जूगु दु। नेवाः स्वायत्त राज्यया निंतिं आन्दोलन याना वयाच्वंगु नेवाः स्वायत्त राज्य मंकाः संघर्ष समितिया ग्वसालय् वंगु ४ गते येँया क्वःने लागाय् नेवाः भेला याःगु खः।
अथे हे गोरखा जिल्लाय् छेँ जुयाः येँय् वयाच्वंपिं नेवाःतय्गु भेला ११ गते, मकवानपुरय् छेँ जुयाः येँय् वयाच्वंपिं नेवाःतय्गु भेला १० गते याइगु जूगु दु। अथे हे म्हिगः जूगु भेलां येँ मनपाया पुलांपिं जनप्रतिनिधितय्गु 'ककस' दयेकेगु निर्णय याःगु दु। ककस तयारी समितिया संयोजक केशव स्थापित व सचिवय् अमररत्न बज्राचार्य च्वनादीगु दुसा ककसपाखें नेवाः एकता दिवसय् फुक्क नेवाःतय्त सतकय् कुहां वयेत आह्वान यासें पुलांपिं जनप्रतिनिधितय्गु ल्हाःचिं तयाः खुल्लापौ पिकायेत्यंगु दु। थुकिया लागिं थ्वहे वइगु १२ गते पुलांपिं जनप्रतिनिधितय्गु बृहत भेला यायेत्यंगु दु।
उकथं हे नेवाः स्वायत्त राज्य मंकाः संघर्ष समितिं १५ गते ३ बजे बसन्तपुरं कुमारी चाःहिलीगु रुटय् प्रचार र्याली पिकायेगु, ९ गते यल देशय् प्रचार र्याली पिकायेगु, १७ गते ४ बजे नेवाः राज्य दुनेया फुक्क नेवाः वस्तीइ सिठी जुलुस पिकायेगु, १६ गते सुथय् ७ बजे नेवाः राज्यया ध्वाँय् ज्वनाः मू मू देगःया गं थायेगु, १२ गते नेवाः व्यापारी भेला यायेगु ग्वसाः ग्वःगु दु। येँ मनपाया पुलांपिं जनप्रतिनिधितय्गु ककसपाखें येँ थ्वहे वइगु पुस ८ गते २ वडा व २७ वडा, १० गते ३० वडा, ११ गते २० वडा, १८ वडा व २६ वडा, १२ गते १९ वडा व ८ गते २४ वडाया नेवाःतय्गु भेला याइगु जूगु दु।
नेवाः एकता दिवसया निंतिं नेवाः स्वायत्त राज्य मंकाः परिषद किपूपाखें वइगु १५, १६ व १७ गते किपू, पांगा व नगामय् अलग अलग कोणसभा याइगु जूगु दु।
