सहमतिप्रति वैद्य पक्षया आपत्ति

प्रदेशया संसदयात 'प्रान्तीय सभा' धायेगु खँय् सहमति

येँ (सन्ध्या टाइम्स)/न्हूगु संविधानया निंतिं विवादित विषययात ज्यंकेत धकाः संविधानसभाया संवैधानिक समिति अन्तर्गत दयेकूगु उपसमितिइ प्रमुख दलया शीर्ष नेतातय्गु दथुइ सहमति जुइधुंकूगु विषययात कयाः एकीकृत माओवादीया बरिष्ठ उपाध्यक्ष मोहन बैद्य किरण पक्षधरया नेतातय्सं आपत्ति प्वंकादीगु दु। थौं संवैधानिक समितिया बैठक च्वंगु इलय् बैद्य पक्षया नेतातय्सं उपसमितिं याःगु सहमति प्रति आपत्ति प्वंकाः हाकनं छलफलया नितिं माग याःगु दु ।

एकीकृत माओवादीया अध्यक्ष प्रचण्ड संयोजक जुयादीगु उपसमितिं जग्गा नापं सम्पत्तिया हदबन्दी मतयेगु, १८ दँ दुपिं नागरिकयात अनिवार्य सैन्य तालिम मबीगु लगायतया विषयय् सहमति याःगु सहमतिप्रति बैद्य पक्षया नेतातय्सं आपत्ति प्वंकादीगु खः। उपसमितिइ सहमति जूगु विषययात कयाः अनुमोदन यायेगु नितिं धकाः थौं संवैधानिक समितिया बैठक च्वंगु खः। वैद्य पक्षया नेतातय्सं सम्पत्तिइ हदबन्दी नापं अनिवार्य सैन्य तालिमयात संवैधानिक व्यवस्था यायेमाःगु, लडाकु समायोजन शब्द नं न्हूगु संविधानय् उल्लेख यायेमाःगु अडान तःगु खः ।

समितिया थौं च्वंगु बैठकय् बैद्य पक्षया नेतात देव गुरुङ, जयपुरी घर्ति व खड्ग विश्वकर्मां उपसमितिया निर्णययात कयाः अथे आपत्ति प्वंकादीगु खः। अथे हे १८ दँ दुपिं नागरिकयात आमनिर्वाचन मतदान याकेगु धकाः उपसमितिइ सहमति याःगुयात कयाः नेपाल मजदुर किसान पार्टीया सुनिल प्रजापति व नेकपा (एकीकृत)या परि थापां नं आपत्ति प्वंकादीगु खः। वय्कःपिंसं १६ दँ दुपिं नागरिकतय्सं नागरिकता काये खनीगु खँ न्ह्यथँसें इमिसं नं मतदान याये दयेमाः धकाः अडान तयाः आपत्ति प्वंकादीगु खः ।

थौं च्वंगु संवैधानिक समितिया बैठकय् प्रान्तीय संसदया नापं 'प्रदेश सभा' धकाः तयेगु खँय् धाःसा सहमति जूगु दु। प्रदेशतय्गु गठन लिपा अन दइगु संसदया नां छु तयेगु धइगु खँय् दलतय् दथुइ विवाद जुयाच्वंगु खः। बैठक लिपा संवैधानिक समितिया सभापति निलाम्बर आचार्यं संघीय व्यवस्थापिकाया नां 'प्रान्तीय सभा' तयेगु धकाः सहमति जूगु जानकारी बियादीगु दु ।