उत्तर कोरियाली नेता किम जोङ इल मन्त, उत्तराधिकारी सु ?

उत्तर कोरियाया नेता किम जोङ इल मदुगु समाचार पिहां व:गु दु । किम जोङ इलया मृत्यु नापं हे अन आ: सु सत्ताया वर्इ धइगु न्ह्‍यस: नं दनाव:गु दु । मदुम्ह नेता किम जोङ इल थ: अबु किम इल सुङ्‍या मृत्यु लिपा नेतृत्वय् व:म्ह ख: । आ: किम जोङ इलया हे काय् किम जोङ बुन नेतृत्वय् वइगु खँ नं पिहां व:गु दु । तर थुकिया पुष्टि धा:सा मजूनि । वंगु शनिवा: हे नेता किम जोङ इल मदुगु ख: । तर थुकिया खुलासा वया: निन्हु लिपा जक जुगु दु । उत्तर कोरियाया सरकारी टेलिभिजन च्यानल नेता किम जोङ इल मदुगु खँ सार्वजनिक या:गु ख: । ता: र्इ न्हय: निसें म्ह मफयाच्वंम्ह नेता किम जोङ इल राजधानी प्योगंयांग पिने रेलय् यात्रा यानाच्वंबलय् वय्‍क:या मृत्यु जूगु ख: धा:गु दु । मृत्युया कारण यक्व शारीरिक व मानसिक थकान धायात:गु द । सन् २००८ सं किम जोङ इलयात ह्दयघात जुगु ख: । अनलिं वयक: सार्वजनिक थासय् उस्त खने मदुगु ख: ।

उत्तर कोरिया साम्यवादी देय् ख: । थनया उप्व: धइथें खँ विश्वया नितिं गुप्त हे जुइ । खय्‍तला विश्व नाप खुल्ला मजुइगु साम्यवादी देय्‍तय्‍गु नियति हे ख: । थुकथं हे किमजोङ इलया मृत्यु नं गुप्त हे जुयाच्वंगु ख: । परिवारवादी सत्ता हावी दुगु उत्तर कोरियाय्‍ आ: मदुम्ह नेताया काययात हे उत्तराधिकारीया रुपय्‍ कयात:गु दु ।पारमाणिक हतियार विकाशयागु कारण अमेरिका व अमेरिकी सम्बन्ध देय्‍या आर्थिक नाकावन्दी लानाच्वंगु उत्तर कोरियाया स्थिति बामला:गु खँ नं इलय्‍ ब्यलय्‍ पिहाँ वयाच्वंगु ख: । निगूगू विश्व युद्ध लिपा कोरियाली प्रायåिपयात कम्युनिष्ट व प्रजातान्त्रिक ल्याख उत्तर कोरिया व दक्षिण कोरिया विभाजन जूगु ख: ।

थौकन्हय्‍ दक्षिण कोरिया विश्वया हे छगू विकसित अर्थतन्त्र दुगु देय्‍या रुपय् विकाश जुइ धुंकूगु दु धा:सा उत्तर कोरिया उतिसुथां ला:गु खनेमदु । सन् १९९४ नेतृत्वय् व:म्ह किम जोङ इलया मृत्यु लिपा आ: सुनां गथे सत्ता न्ह्‍याकाच्वन धैगु खँ पिहा: मव:नि ।

More Stories Like this