हत्या व लाशय् राजनीति गुबले तक ?
मानवीय संवेदनानाप स्वा:गु हत्या व लाशय् राजनीति यायगु चलन नेपालय् नं उतिकं जुयावयाच्वंगु दु । विशेष याना: विचार व सिद्धान्तया राजनीति न्ह्याये मफुत धायेवं जुइगु राजनीति ला थुज्व:गु हे ख: । थुकथंया राजनीति यायेत नेपालय् वामपन्थीत तसकं च्वन्ह्या: । उकिसनं बन्द व हडताल धइगु वामपन्थीतय्गु नितिं राजनीति यायेगु 'चलनचल्ती'या तरिका ख: । नेपाली कांग्रेसं धा:सा थुकथंया खँया आपा: धइथें विरोध हे याना वयाच्वंगु ख: । नेपाली कांग्रेस थुकथं 'भलादमी' जुयाच्वनेफुगु हुनिं धइगु कांग्रेसया ल्हातय् आपा: धइथें इलय् सत्ता लानाच्वनीगुलिं नं ख: । सत्ताय् मदुगु इलय् नं कांग्रेसया हैसियत उबलय् सत्तानाप 'ह्याण्डसम' पहलं लेनादेना यायेफुगु जूगुलि नं नेपाल बन्द हडताल थुज्व:गु ज्या दिकेत कांग्रेस न्ह्यचिलेगु या: । तर कुमा:या घ:चा: चा:हिलेगु या: धा:थें आ: नेपालय् दकलय् आपा: उग्र धा:पिं माओवादीत सत्ताय् दु धा:सा सत्तारुढ मानसिकता दुपिं कांग्रेसत संविधानसभाया चुनावया छुं र्इ लिपानिसें सत्तां पिने हे लानाच्वंगु दु । अझ गिरिजाप्रसाद कोइराला मदयेधुंका: ला छगूकथं छुं हदतक हा:ना: मदुथें जुयाच्वंगु नं दु । अथेजूगुलिं इपिं दुनेदुनें आक्रोशित जुयाच्वंगु दु धा:सा भरतपुर कारागारय् तरुण दलया चितवन अध्यक्ष शिव पौडेलयात सांघातिक आक्रमण जूगु विरुद्ध इपिं आक्रमक शैलीं हे पेश जुल । अले घा:पा: जूम्ह पौडेल सी धुंका: ला झन् हे उग्र रुपं पिहाँ वया: आकाझाकां हे तोडफोड व बन्दय् उत्रे जुल ।
थुगु घटनाया मेगु छगू पहलू नं दु । घटनाय् सीम्ह शिव पौडेल आन्दोलनय् पुलिसं कयेकूगु गोलीं कया: सीगु मखु, न त लाठी चार्जय् लाना: घा:पा: जुया: सीगु ख: । थ्व ला निगू राजनीतिक संरक्षण प्राप्त व राजनीतिक आवरणयुक्त निथ्व:सिगु ल्वापुइ लाना: मनू सीगु ख: । थ्व नितान्त रुपं आपराधिक समूहया ल्वापु ख: । नेपालय् थुकथंया स्थिति ब्वलनाच्वंगु व नेपा:या युवा वर्ग थुकथं फँसे जुयाच्वंगु 'सीन' ला न्हापा हे खनेदयाव:गु ख: । थ्वयां न्ह्य: अपराधीतय्गु नितिं कारागार धइगु ला सेफ हेभेन थें जुयाच्वंगु स्यूगु हे ख: । अपराध याना: कैद भुक्तान यानाच्वंपिसं पुलिस कर्मचारीतय्त हे वियर त्वंका: थथे या अथे या धका आदेश बीगु या:गु घटना नं पिहाँ वयेधुंकूगु हे खँ ख: । नापं जेलनाप सम्पर्क दुपिं मनूतसें नं थ्व खँ खना हे वयाच्वंगु ख: । अझ जेलय् दुने तकं पिनेया अपराधी दुहाँ वना: गोली प्रहार यायेगु तकं ज्या जुल । न्हापा जेलयात सुरक्षित थाय धका: धायेगु या: । अन असुरक्षा दुसा पुलांगु भवन जुया: भुखाय् ब्वइबलय् दुना वया: ल्हाइगु ख:ला धइगु ख: । तर आ: अन दुनेया स्थिति ग्यांग फाइटया नितिं नं उपयुक्त स्थल जूगु नं खनेदत । थ्व नेपा:या दकलय् त:धंगु दुर्दशाया छगू प्रमाण जूगु दु । थुखे पाखे ध्यान मब्युसें राजनीति यायेगु धइगु अझ नं थनया नेतातय् होश मदुनिं धइगु चिं ख: ।
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
