राष्टि्रय सरकार हानं राजनीतिक मुद्दा जुल
बुँदे बुँदे सहमतिया ज:मू जपे यायेगु व राष्टि्रय सहमतिया सरकारय् भजन गान यायेगु नेपा:या राजनीतिया थौंकन्हय्या अन्तर्वस्तु जूगु दु । माओवादी व मधेसी मोर्चाया दथुइ सरकार गठन यायेत जूगु प्यंगू बुँदाया सम्झौता, अनंलि प्यंगू दलया दथुइ जूगु न्हय्गू बुँदाया सम्झौता व हानं संविधान सभाया म्याद तनेत प्यंगू दल मा:गु खुगू बुँदाया सम्झौता थौंकन्हय्या 'कि्रयाशील हीरो' सम्झौता जुयाच्वंगु दु । थ्वया नापनापं संविधानसभाया चुनाव न्ह्य:निसें 'दयेके हे मा:गु' ठहर जुयाव:गु तर आ:तक गठन जुइमफुनिगु राष्टि्रय सहमतिया सरकार नं राजनीतिइ भजनगानया विषयवस्तु जुयाच्वंगु दु । थुकी हानं व:गु चर्चा खुगू बुँदाया सम्झौताय् दुथ्याना च्वंकथं व:गु दु ।
राष्टि्रय सहमतिया सरकार गठन यायेगु नितिं हरेक प्रधानमन्त्रीया चुनाव न्ह्य: राष्ट्रपतिं संविधानत: र्इ बीगु व दलतसें थप र्इ नं काइगु जुयावयाच्वंगु दु । तर हरेक पटक दलत असफल जुया: बहुमतया सरकार दयेकेगु ज्या जुयाच्वंगु नं झीसं खना हे च्वनागु दु । थुकी बहुमतया सरकारयात हे सर्वदलीय सहमतिया सरकार दयेकेगु धका: दावी यायेगु ज्या नं जुया हे वयाच्वंगु दु ।
नेपा:या राजनीतिया थुज्व:गु पहलं न्हापा जुजुं नियुक्ति या:म्ह प्रम लोकेन्द्र बहादुर चन्दं थ:पिनिगु हे सरकारं चुनाव याका: न्हूगु निर्वाचित सरकारयात सत्ता हस्तान्तरण यायेगु धा:गु खँ लुमंसे वइ । सूर्यबहादुर थापां नं उबलय् अथेहे धा:गु ख: । थापां ला चुनाव याकेगु योजना दयेका: चुनावय् थ: मनू त्याका हयेगु नितिं स्थानीय निकायस भर्ती नं या:गु ख: । तर व खँ इमिगु थ:गु अस्तित्वया आैचित्य प्रमाणित यायेगु कसरत बाहेक मेगु ठहर मजुल । थुकथं हे राष्टि्रय सहमतिया सरकार दयेकेमा:गु थौंया आवश्यकता ख: । संविधान निर्माण व सेना समायोजनया नितिं राष्टि्रय सहमतिया सरकार मा:गु ख: धका: वहे दलया नेतातसें धयाजूगु दु । तर थुकिया नितिं सहमति यायेगु सहमति बाहेक छुं मजुल ।
वास्तवय राष्टि्रय सहमतिया सरकार गठन यायेमा:गुली गठन मयासें बहुमतया सरकार गठन जूगुली थुकिया आैचित्य सिद्ध यायेत नं थांैया सरकारं राष्टि्रय सहमतिया सरकारया नां कया जूगु खनेदु धा:सा मेखे थ:पिनि कार्यकर्ता, कर्मचारीतन्त्र व मेपिनिगु दथुइ नं थ:पिं शक्तिशाली हे ख: कमजोर सरकार मखु धका: क्यनेत नं थुकथं थ:पिनिगु नेतृत्वया सरकार हे राष्टि्रय सहमतिया सरकारया रुपय् वइगु दावी यानाच्वंगु खनेदु । ७ गू बुँदाया सहमति जुइवं थुगु सरकारं थ:पिनिगु सरकार हे राष्टि्रय सहमतिया सरकार जुइगु दावी यात, हानं थ्व खँय् प्रतिकार याइपिनि स: तच्वल । अनंलि चिनिया प्रधानमन्त्रीया भ्रमण लिहाँ वने न्ह्य:ला सरकार हे क्व:थलेगु कथं मधेशी मोर्चां धम्की बिल । तर चिनिया प्रधानमन्त्रीया भ्रमण लिज्यां वंगु खँ पिदनेवं वहे मधेशी नेतातसें थुगु हे सरकार राष्टि्रय सहमतिया सरकार जुइफुगु दावी नं या:गु दु । थुकथं नेपा:या राजनीति नेपा:या हिसाबकिताबं सिकं विदेशी हिसाब किताबं न्ह्यानाच्वंगु खनेदु । थुकी राष्टि्रय सहमतिया सरकार छगू इश्यू जक ख: ।
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
