लुम्बिनी अन्तर्राष्टि्रय क्षेत्रया ध्यानशाला †
उखुन्हु शनिवा: थाइल्याण्डया पूर्वप्रधानमन्त्री थाक्सिन सिनावात्रा लुम्बिनीइ थ्यंका: मायादेवी देग:या साइडय् च्वंगु अशोक स्तम्भ नापसं च्वंगु थासय् च्वना: प्रार्थना यात । थुकिं लुम्बिनीया नां छक्व: नेपा:या पत्रपत्रिकाय् चर्चाय् व:गु दु । थ्वसिकं न्ह्य: माओवादी नाय: प्रचण्ड व पूर्वयुवराज पारस नापं उपाध्यक्ष पदय् दुगु अपेक धइगु संस्थां लुम्बिनीया विकासया नितिं अरबौं लगानी याइगु धइगु कथंया खँ पिहाँ व:गु ख: । थुगु संस्थाया विश्वसनीयता व माओवादी नाय: व पूर्वयुवराज गुकथं उपाध्यक्ष जूवन धइगु आशंका व विवाद पिहाँ व:गु ख: । वयांल्यू उगु अपेक धइगु संस्थाया मुख्यालय गुबलें गन गुबलें गन नं धाल, लिपा अथेंहे तुं जुल ।
अनंलि डा. बाबुराम भट्टरार्इया सरकारं प्रचण्डयात हे बृहत्तर लुम्बिनी विकास प्रवर्द्धन समितिया नाय: दयेकल । प्रचण्ड न्यूयोर्कय् वना: संयुक्त राष्ट्र संघया महासचिव वान कि मुन नाप लाना: खँ ल्हात । अनंलि वान कि मुनया हे कुतलं दक्षिण कोरियापाखें लुम्बिनी विकासया नितिं त:धंगु ग्वाहालि वइगु जुयाच्वंगु दु । हानं लुम्बिनी विकास कोषय् गैरबौद्ध कर्मचारी नापं अनया अव्यवस्थाया खँ नं पिहाँ वयाच्वंगु दु । थुकी सरकारया ध्यान वनाच्वंगु मदुनि । हानं उगु लागाय् अन्तर्राष्टि्रय विमानस्थल दयेकेगु धइगु खँ नं अथें हे तिनि । आ: लुम्बिनी लाइमलाइटय् वसेंलि थुखेपाखे नं ज्या जुइ धइगु आशा कायेछिं । तर लुम्बिनीयात तीर्थस्थलया रुपय् जक मखु विश्वस्तरय् ध्यानागारया रुपय् नं विकास यायेफइगु सम्भावना खनेदुगु दु । थुखेपाखे नं सरकार व बौद्ध जगतया ध्यान वनेमा:गु खनेदु ।
लुम्बिनीया मायादेवी देग:या ज:ख: उगु रुपं शान्तिया महसुस जू, व अनया पिनेया वातावरणया हुनिं जूगु खनेदु । वास्तवय् अन लागाय् ध्यानागार व प्रार्थना हलत दयेकेगु ख:सा उकिं नं मेगु छगू उपलब्धि हासिल जुइ । विशेष याना: विपस्यना ध्यान, थीथी भासं बौद्ध प्रार्थनाया धात्थें हे त:धंगु महत्व दु । थुकिं मनूतय्त वास्तविक शान्ति व आनन्दया अनुभूति याकेगु नापं स्वस्थ व सन्तुलित जीवन हनेत त:धंगु ग्वाहालि याइ । खास रुपं थ्व खँ उलि व्यापक रुपं प्रचार जुयाच्वंगु मखु । बौद्ध विधि व व्यवहारया नं उलि प्रचार मदु । लुम्बिनी लागाय् उकथंया व्यवस्था याना: अन्तर्राष्टिय ख्य:या ध्यान सालेमा:गु नं थौंया छगू आवश्यकता ख: ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
