कांग्रेसया हिलावंगु रणनीति देय्या दुर्गती
यूरोपीय यूनियनं नेपालय् बन्द हडताल याइपिन्त भिसा बीमखु धका: धा:गु खँयात कांग्रेस नेता अजर्ुननरसिंह केसीं लिस: ब्यूगु दु – सुयां भिसा कायेत कांग्रेसं राजनीति या:गु मखु, लोकतन्त्रया नितिं लडाइँ या:गु पार्टीं भिसा वइमखु धका: ग्याना: थ:गु निर्णय हिलीमखु ।
वास्तवय् कांग्रेस शक्ति केन्द्रतय्त लय्तायेका: हे राजनीतिया उचाइलय् थ्यंगु ख: धा:सा २००७ साल व २०४६ साललिपाया कार्यकर्तात नं उकथंया हे आपा: दुगु पार्टी ख: । तर देसय् आन्दोलन याना: जनताया मन त्याका: शक्तिशाली जूपिं दलया नेतातय्त नं शक्तिकेन्द्रतसें क्याल्कुलेशनय् काल । शक्ति केन्द्रतसें एमाले व माओवादी थुज्व:गु दलतनाप हिसाब किताब या:जूतले कांग्रेस ल्यूने लात । थुकिं याना: कांग्रेसं थ:पिनि कार्यकर्तातय्त कांग्रेसप्रति हे प्रतिबद्ध याना तयेत नं समस्या जुल ।
माओवादीया कार्यकर्तातय्त नेतृत्वया विरुद्ध भडके यायेत तल्लीन जुयाच्वंपिं कांग्रेस नेतातय्त आ: थ:पिनिगु कार्यकर्तातय्गु स: व स्पिरिटयात तिब: बीमा:गु अवस्था वल । थुकिं नेपाली कांग्रेस स्वयम् हे वंगु पुस ४ गते नेपा: बन्दया नितिं न्ह्यचिल । नेपाली कांग्रेस विदेशीतय्गु खँपु न्यना: बन्द यात छ्वासुकेगु ज्या मया:, बरु थ:पिं नं सुं स्वयां कम मजू धका: क्यनेत तोडफोडया घटना नं उतिकं यात । थुगु खँ स्वयेबलय् नं नेपाली कांग्रेसं थ: कार्यकर्तातय्त थुगु बन्दय् खुल्ला त्व:तूगु खनेदुगु दु ।
कांग्रेसं भरतपुर कारागारय् सांघातिक आक्रमणय् लाना: सीम्ह तरुण दलया चितवन जिल्ला अध्यक्ष शिव पौडेलयात लानाच्वंगु मुद्दा लित कायेमा:गु व सीम्हेसित शहीद घोषणा यायेमा:गु थुज्व:गु माग त:गु दु । थुकिं कांग्रेसप्रति जनता रुष्ट नं जूगु दु । तर थुकथं जनता रुष्ट जूगु खँय् कांग्रेसयात छुं पर्वाह मदु, वयात ला थ: कार्यकर्तातय्त न्ह्यचिकेमा:गु दु । नेपाली कांग्रेस बन्दय् न्ह्यच्यूगु मूलभूत धार थ्वहे खनेदु । तर नेपाली कांग्रेस बन्द ज्याझ्वलय् न्ह्यचिले धुंका: आ: मेपिन्त बन्द ज्याझ्व:यात धका: धायेगु कांग्रेसयाके नैतिक अधिकार नं मन्त ।
खतुं कांग्रेसं नं २००७ साल न्ह्य: सशस्त्र आन्दोलन हे या:गु ख: । २०१७ सालय् 'कू' जुइधुंका: ल्वाभ: ल्ह्वंगु हे ख: । अनंलि २०४६ सालया आन्दोलनया झ्वलय् जूगु बन्द ज्याझ्वलय् वाममोर्चालिसें तुं बन्दया आह्वान या:गु हे ख: । अथे जूगुलिं सवाल कम्यूनिष्ट ख: कि कांग्रेस धइगु ल्याखं इमिसं छु याइ धइगु निर्धारण जुइगु सिकं नेपालय् सत्ताय् दु वा मदु धइगु खं हे आपालं ज्याखँत निर्भर जुइगु जुयाच्वंगु दु । थ्व खँ झीसं खना हे वयाच्वनागु ख: ।
थुकिं थुज्व:गु ज्याझ्व:यात निरपेक्ष रुपं स्वयेगु पाय्छि मजू । गुम्हस्यां थुकथं निरपेक्ष रुपं स्वया: बन्द हडताल यायेमज्यू धका: कांग्रेसयात समर्थन यात, इमिगु थौं वया: न्हाय् भुयूगु दु । वास्तवय् नेपालय् सत्तामुखी राजनीतिं हे आपा: गतिविधि निर्धारण जुया: स्यनाच्वंगु दु । आ: कांग्रेसं नं वहे लँपु लिपा तोडफोडकारी गतिविधि या:गु दु, उकिं याना: नेपा: झन् झन् हे स्यना वनीगु अवस्थाय् न्ह्या: वनीगु निश्चित खनेदु ।
म्हिग:तक कांग्रेसं सरकाय् न्ह्याम्ह वंसां थ:पिसं रचनात्मक प्रतिपक्षीया भूमिका म्हितेगु व ज्याखँया आधारय् समर्थन व विरोध यायेगु धयावयाच्वंगु ख: । तर बन्द थुज्व:गु ज्याझ्व: तया: व बन्दया नितिं कार्यकर्तातय्त जक लय् तायेकेगु माग तया: कांग्रेसं थ:त विध्वंसात्मक व धुन्धकारीया रुपय् न्ह्यचीकूगु दु ।
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
