पुनर्वर्गीकरणय् पुनर्विचारया आवश्यकता

नकतिनि क्वचाःगु माओवादी लडाकुतय् पुनर्वर्गीकरणय् सेनाय् वनेगु इच्छा याःपिं लडाकतु अप्वः दयेवं आः थ्व अप्वःपिं लडाकुतय्त छु यायेगु धइगु छगू समस्या पिहां वःगु दु। प्यंगू दल दथुइ जूगु सहमति कथं १९ हजार मध्ये ६५०० म्ह लडाकुयात जक सेनाय् समायोजन यायेमाःगु खः।
तर पुनर्वर्गीकरणया ज्या न्हयाःबलय् समायोजनय् वने धाःपिं लडाकुतय् ल्याः ९००० स्वयां अप्वः दयाबीवं अप्वःपिं लडाकुयात छु यायेगु धइगु समस्या पिहां वःगु खः। थुकियात कयाः माओवादीं हानं छक्वः बिचाः यायेमाली धकाः इनाप यायेधुकूगु दुसा नेपाली कांग्रेस व एमालें धाःसा न्हापा सहमति जूगु स्वयां अप्वः समायोजन यायेफइ मखु धकाः थःगु बिचाः बीधुंकूगु दु। थुकिं यानाः सेना समायोजनया ल्यं दनिगु मेगु ज्या न्ह्याःवनेत समस्या जूगु दु।
स्वैच्छिक अवकास कायेगु धकाः बिचाः बिउपिं लडाकुतय्त शिविरं अलग्ग तयाः उमित माःगु ध्यबा बियाः शिविरं पिने छ्वयेमाःगु खःसां सेनाय् वने धाःपिनिगु स्थिति स्पष्ट मजूगुलिं ज्या थानाच्वंगु खः। खतुं थ्व माओवादीं जक धयां जीगु विषय मखु।
आः फुक्कं दलत जानाः समायोजनय् वने धाःपिं फुकसितं छ्वत धाःसा छु जुइ, मछ्वत धाःसा छु जुइ, भविष्यय् थुकिं गज्याःगु लिच्वः ब्वलंकी बिचाः यानाः पुलांगु निर्णयया सवालय् पुनर्विचार याःसा उकिं सकस्यां हित हे जुइ। थ्व लडाकु आः माओवादीया जक लडाकु मखु, मुलुकया हे लडाकु खः धइगु भावना सकस्यां तयेमाः।

More Stories Like this