एकान्त गन दु?

नर्मदेश्वर प्रधान

खँयाखँय्

"च्वयेत गज्याःगु थाय् यः?" अन्तर्वार्ताया अन्तय् च्वमिपिंत न्ह्यसः तइ। अक्सर च्वमिपिनि लिसः जुइ। "शान्त थाय्। सुं हे मदुथाय्। एकान्तय्।" थज्याःगु लिसः यक्व हे च्वमिपाखें वइ। गुलिस्यां अझ धाइ। "सुनसान क्यबय्.....। स्वां ह्याच्वंथाय्...गन झंगः पंक्षीया सुमधुर म्ये थ्वयाच्वनी....।" हानं गुलिस्यां क्यब, स्वां, झंगःया खँ त्वःती। चाया सुनसान, एकान्त वातावरणया खँ हइ। "निस्तब्ध चाया शान्त वातावरणय् च्वयेगु उपयुक्त ई जुइ।" गुलि च्वमितय् आह जुइ। नांजाःम्ह बाखं च्वमि छम्ह मय्जुं खँयाखँय् धाःगु लुमनी....."च्वयेत जिं छेँया चिकूचागु क्यबय् च्वंवने। च्वये....।" जि नं च्वयेगु शौंख। छुं नं छुं च्वयाच्वने। गन च्वनाः च्वयेगु? जिगु पूर्वाग्रह मदु। न्हिनय् नं च्वया। गुबलें चान्हय् नं। एकान्त क्यबय्। सुनसान जंगलय् वनेमाः। च्वयेत। अथे धइगु मदु। क्वथाय् च्वने। च्वये। गुबलें इलं मलानाच्वनी। मती खँत दइ। वइ। च्वयेफइ मखु। लिलाइ। मुंका तयागु खँत प्वंके। गुलिस्यां च्वसु माल धाइ। जिउ धाये। च्वयेफयाच्वनी मखु। जंगलय्, एकान्तय् वनेमलानाः मखु। स्पष्ट कारणत दयाच्वनी मखु। अय्नं लिमलाः थें जुयाच्वनी। च्वये सिधल। फोनं धयाछवये। धात्थें च्वयेगु सुरु हे जुइ मखुनि। मती दयेवं जक गन जिउ। दबाब नं मालाच्वनी। लेख काः वये। दबावय् लाइ। लेखत दबावं नं पिहां वः। च्वयेत शान्त क्यब। वनजङ्गल पियामच्वना ।

कवित भावुक जुइ। इमिसं हुलमुल ययेकी मखु। इमित एकान्त क्यब यइ। सुनसान जंगल यइ। स्वां-सिमातय् सौन्दर्यं इपिं मुग्ध जुइ। कवितय् विषयय् थज्याःगु मान्यता दु। रोमानी धारणा खनेदइ। ल्याय्म्ह बलय् कवि चित्तधर, कवि सिद्धिचरण उखेथुखे शान्त प्राकृतिक स्थलय् चाःहिउवं। वय्कःपिंसं झंगः, खुसि, झरना, स्वांया विषयय् कवितात च्वइ। वय्कःपिं जेलय् लाइ। चान्हय् न्ह्यः वइ मखु। कलाः लुमनी। कविता च्वइ। चित्तधर, सिद्धिचरणपिनि जीवनी ब्वने। थज्याःगु खँत वयाच्वनी। शायद वय्कः कविपिनि उदाहरणं जुइमाः। कविता लुइकेत, च्वयेत एकान्त माः। शून्य थाय् प्रिय जुइ। चाया ई पाय्छि जुइ। आग्रह ब्वलनी। एकान्त यः। शून्य वातावरण माः। कवि च्वमि जुइत थथे धाये हे माः। थज्याःगु संस्कार गुलिखे कवि लेखकतय्के दयाबी। इमिसं व्यक्त याइ। कवि लेखक धायेबलय् थज्याःगु लिसः अनिवार्य जुइ। गुलिस्यां तायेकी। थ्व हे कारण, मान्यतां जुइमाः। अन्तर्वार्ताय् लेखकतय्सं फर्मेयाइ। सुं मदुथाय्। एकान्त थाय्। क्यबय्। सुनसान चान्हय्। कलम संके। च्वये ।

च्वयेत गज्याःगु वातावरण माः। गज्याःगु अवस्था उचित जुइ। एकान्त, शान्त क्यब। निस्तब्ध चा। च्वयेगु थज्याःगु हे परिस्थिती जक सम्भव जुइ। मेगु इलय् असम्भव। थ्व निर्विवाद तथ्य खःला? रोमानी कविपिं एकान्तप्रिय जुइ। इमिसं कल्पनाया खेती याइ। भावुकताय् इपिं चुर्लुम्म दुनी। यथार्थं पलायन जुइ। इमिसं सृजना न्ह्याकेत एकान्त म्हइ। शून्य थाय् ल्यइ। चाया निस्तब्धताया स्त्तुति याइ। इमिसं सिउ। कल्पनाया खेती। पलायनया सम्भावना। थज्याःगु हे वातावरणय् जक सम्भव जुइ।
थौं कविता साहित्ययात शहरीकरणं त्वपुइ धुंकी। जटिल सामाजिकीकरणं काकेधुंकी। कल्पनाय् तने। सन्तोष काये। मन तये। थ्व रोमानी चिन्तन खः। थौं भोगवादी चिन्तन सक्रिय जुइ। काल्पनिक सन्तोषं जक मन तया जुइ। थौंया मान्यता जुइमखु। यथार्थयात भोग यायेमाः ।

थ्व कल्पनां न्ह्याइमखु। जःखःया यथार्थया भोगं थौं च्वमितय्त संकाबी। संकाच्वनी। कवि साहित्यकारत अफिसय् च्वनी। अफिसय् नं सृजना यायेफइ। युद्धभूमिइ नं साहित्य स्फुरित जुइफु। वेश्यालय दुने नं बाखंत रचित जुइफु। कवि साहित्यकारतय् नुगलय् गन च्वयेगु इच्छा तरङ्गीत जुइ, वं च्वइ। च्वयेगु वातावरण दयेकी। निस्तब्ध चां पियाच्वनी मखु। एकान्त वनजंगल माःवनी मखु। गुलिखे घटना खनी। स्वस्वं साहित्य सृजना याइ। मनूतलिसे खँल्हाबल्हां गुलिखे रचना याइ। थ्व तर्क। एकान्त वातावरण। शान्त थाय्या विरोधी मखु। गुलिसितं थज्याःगु स्थिति मालेफु। तर साहित्यकारतय् सृजना वातावरणया सन्दर्भय् छाय् रोमानी धारणा फेशन जुयाः खनेदत? जिज्ञासा प्वंकाच्वनागु जक खः ।

कवि, साहित्यकार विषयय् म्हिगःया धारणा जुइ। थुपिं आदर्शवादी जुइ। गरिब जुइ। क्रान्तिकारी जुइ। शोषण विरोधी जुइ। विलाशिताया खिलाफय् जुइ। थुमि जीवन सरल जुइ। नये त्वने, पुनेया सौंख थुमिके दइ मखु। थुपिं समाजसेवक जुइ। दुःखीतप्रति संवेदनशील जुइ। थुमि छेँ भिखा छेँ थें जुइ। धनसम्पतिप्रति थुपिं आशक्त जुइमखु। दुगु वैभव त्याग याइ। थुपिं त्यागी जुइ। चित्तधर, सिद्धिचरण, व्यथित, दुर्गालाल कवि साहित्यकारतय् थुकथं हे मनन, चित्रण याइ। थज्याःगु हे खँ हइ। इमि बयान याइ। इमित सरल तायेकी। गरिब खंकी। त्यागी धयाबी। मानवतावादी धयाछ्वइ ।

तर। थौंकन्हय्। थ्व धारणाय् हिउपाः खनेदइ। थ्व मान्यतां मेगु हे रुप ब्वइ। हालय् छगू च्वसु ब्वने। उकी न्ह्यथनातइ। कवि साहित्यकारत गरीब जुइमाः। इमित भ्वाथःगु लं हे जक ल्वइ। इमि ख्वालय् दारी अनिवार्य जुइ। इपिं त्यागी खनेदये हे माः। थ्व फुक्क गलत धारणा खः। कवि साहित्यकातय्सं नं सूट फीफु। ताइ तयेफु। मोटर गयेफु। आलीसान बंगलाय् च्वनेफु। विलासी जीवन हनेफु। कवि साहित्यकारप्रतिया पुलांगु धारणा गलत खः। हिलेमाः। न्हूगु दृष्टिकोण छ्यलेमाः। जिं ब्वनागु च्वसुं सः थ्वयेकी। साहित्य नं थौं स्वतन्त्र बजारय् थ्यनेधुंकूगु दु। स्वतन्त्र बजारया म्वायेगु संर्घषय् म्वाये सःपिं, फुपिं म्वाइ। इमि ऐश आरामया खँय् छुं बन्देज दइमखु। दये मजिउ। इपिं धनी जुइफु। वैभवशाली जुइफु। जिं ब्वनागु च्वसुं वकालत याइ। थौं कवि जुयां नं धनी जुइफु। धनी जुयां नं कवि जुइफु। थ्व मान्यतां बजार कयाहइ।
छता खँ। एकान्त थासय् वने। शान्त वातावरणय् च्वने। कविता, साहित्य सृजना याये। थथे धाइपिंत नं थौं समस्यां लिनाहइ। एकान्त थाय् फुक्क थौंकन्हय् ल्याय्म्हल्यासेतय् प्रेम क्रिडास्थल जुइ। स्वय्म्भूया जंगल, गुज्हेश्वरी, श्लेषमान्तक वन प्रेम पार्कय् हिलेधुंकी। पूमजूगु, विशुद्ध, एकान्त गन दु? धाये मफयेधुंकी ।

More Stories Like this